Buinis vacancis

    
 Fevrâr, classic mês di feriis ta cheste part a sud dal mont, che al vignarês a jessi tanche il mês di Avost te part nord dal mont, in ducj doi i câs vuê in dì, la grant part de int e va a cjapâ soreli e a fâsi i bagns di aghe di mâr, baste sielzi la localitât che plui a confâs al caratar e ae sachete di ogni un.
...
     In cheste epoche in Friûl al fas frêt, e dal sigûr al varà ancje neveât, e alore ; ¿ ce fasino tancj di lôr ?
" La setemane blancje ", ven a stai che van a schiâ, puescj ‘nd`e tancj in Friûl, par es. ; Tarvis, Plan dal Cjaval, Sele Nevee e altris.
...
¿ Chest preambul ce vuelial dî ? che ancje jo, che ogni setemane o cîr di dîus alc a traviers di chest mieç di informazion, "svuedant la cite" a gno mût, o cjaparai lis mês vacancis.
...
E cun me ancje "Leturis" e fasarà lis sôs feriis, o tornarin il miercus ai 4 di Març. Buinis vacancis a ducj. Mandi
---

Cjante che ti passe

 

Za che si fevele di cjant, o ricuardi al "Cuartet Vocâl Armonie ". Nassût tal lontan 1966, al puartà il cjant furlan e no dome, in lunc e in larc pe Argjentine e tal  Friûl, in cheste ocasion lu compagnave al piano il Mestri Rodolfo Kubik. O vuei ancje ricuardâ i nons dai compagns di cjant, Ferruccio Silvestro Edonti, Fulvio Cosatto e Carlos Gurisatti. Tantis emozions e ricuarts.

---------

Cjantâ al fâs ben al cûr, ae respirazion e al cerviel, cussì a pandin lis ricercjis fatis. Diviersis societâts primitivis a dopravin il cjant come pratiche di vuarison. Une cjantade a buinore e une tor sere al somee che al fâs ben al spirt e al fisic, il cjant al à proprietâts terapeutichis straordenaris; l'aument de auto stime, il bon stâ e la felicitât. Cjantà cun altris al jude a stâ ben cul prossim, al è un moment significatîf di leam sociâl.

...

Tancj a crodin di sei distonâts, e di no podê leâ dôs notis tra di lôr, ma si pues ancje crodi che si trati di un sempliç bloc, che si po rimovi. Al è un pecjât che la int no cjanti, o che lu fâsi masse pôc.

O ricuardi che in Friûl, intai agns de infanzie, la int e cjantave da par dut,  tai cjamps, te ostarie, in glesie e ancje sot sere tai curtîi, bastave che un al tacàs, subit si sintive une seconde vôs, podopo une vôs di bas, cussì si formave un cor, o amet che cualchidun ancje al jere distonât.

...

Resintis investigazions a confermarin dai efiets terapeutics dal cjant. La emission de vôs cjantade, a disferìnse de vôs fevelade, e prodûs dai stimui fisics benefics pal organisim, puartânt in aument i ormons dal sisteme gnervôs che a stimulin lis sensazions di plasè, ligrie e ben stâ. Val a dî che o podìn fevelâ di une “terapie dal cjant”, cui tiermins che vuê si fevele ancje di une “terapie dal ridi”.

--- 

Cuant che il “cjant individuâl” si trasforme in “cjant di grup” al puarte maiôrs beneficis, al facilitâ lis interazions sociâls, come: la fradilance, la amicizie e la cooperazion mutue.

 ---

Cjantin plui che o podin. Mandi 

---   

Il pignarûl di Tarcint

   Un dai pignarûi plui innomenâts in Friûl al è chel di Tarcint, une biele citadine clamade " La Perle dal Friûl ", che si cjate a une ventine di km. a nord di Udin, e à une altitudin di 230 metris. s.l.m.  Su la culine che domine Tarcint si cjate la frazion di Cuie, cjariade di storie e tradizions; li al è il famôs " Cjistielat ",  che te gnot de Pifanie (6 di zenâr), si lumine cu lis flamis dal
" Grant pignarûl ".
 ---
     Di cualchi an in ca si puarte indevant une competizion fra dutis lis borgadis dal "Tarcentin ", al consist in cjars cun dal fûc parsore tirats da zovins dal lûc, chel che al rive prin, e sarà premiade la frazion di partignince, e se cun ducj chescj fûcs nol fos vonde, a train ancje cun chei artificiâi.
---
     Cun ogni probabilitât i rituâi dal fogaron nus son rivâts de antighe religjositât dai Celtis, che a impiavin fûcs propiziatoris al Diu Beleno.
---
     Se il fum al va a soreli jevât, cjape il sac e va a marcjât.
Se il fum al va a soreli a mont, cjape il sac e va pal mont.
 ---

     Chest al è l’oracul che lu dîs il “Vecjo venerânt”, cjalânt viers dulà che si indrece il fum dal pignarûl. 

---                            

I trê re magos e la befane

     Une dì, i trê Re Magos a partirin cjariâts di regâi pal bambin Jesù: aur, incens e mire. A àn traviersât tancj paîs, ju vuidave une stele comete, e in ogni lûc che si fermavin, dute la int e voleve cognossiju e là cun lôr, dome une vecjute si è refudade di unîsi al grup. Tal doman, pintude, e cirì i trê Re, ma lôr à jerin bielzà une vorone lontans. Par chest, la vecjute no à mai viodût il bambin Jesù.
 ---
     Di fat inte gnot fra il cinc e il sîs di zenâr, svolant suntune scove e cuntun sac su lis spalis e jentre tes cjasis calantsi ju dal cjamin, e li che a son fruts ur lasse i regaluçs che no à podût dajai al bambinut, ( a chest pont za o varês capît, che o stoi fevelant de Befane ), al po ancje sucedi che, se il frut al è stât disubidient e no tant brâf, al cjatarà di sigûr dal cjarbon e de cinise.
---
Us disarai ancje che la " Pifanie, dutis lis fiestis lis puarte vie.”
--- 
Fra tantis versions sui re magos, jo o disarès di tignì par buine chê che nus conte che: vignint dal Orient a i an puartât al bambin Jesù, aur incens e mire, convertintsi daspò intune tradizion di fâ dai regâi ai fruts. Cui di nô no aial vût la felicitât di ricevi cualchi don in chel dì ?.
     Us auguri che ducj o ricevedis il regâl che us meretais.
---
Mandi. 
---