"Il Cjanton di Anute", Il grim

 

      Cui no si ricuardial dal grim de none ?

     Chei de mê etât, a san ce che o dîs, ancje lôr lu àn gjoldût come me…

Jo o vignivi fûr di scuele tai dopomisdì di invier, un frêt di murì, la none e jere te stale a scjaldâsi cul flât des vacjis, sentade sore une bale di stranc, gugjant maiis e cjalcis par dute la famee.

     Cualchi volte e filave cul fûs, fasint vignî chê glagn di lane cussì fine che  someave comprade, cun chês manutis secjis e strussiadis a fuarce di lâ a fâ lens e baraçs tal bosc.

     Alore po, apene che o tornavi di scuele, o corevi drete te stale, là che la none mi spietave cul so grim cjaldut come une stue, jo o jeri simpri ingrisignide se ben che o vevi la maie e cjalcis di lane e i çupiei di len che ju faseve il “pai”, però la none cu lis sôs cotulonis penzis e grandis mi faseve une cove tal so grim, e jo o saltavi dentri, mi pareve di sei un poleçut sot de clocje.

Vêso capide la storie dal grim ?

     Cumò lis nonis a usin bregons, i frutins si scjaldin cu la stue, e jo che îr sere o soi insumiade cu la none, o ai sintût i piis in bore come che o fos tal so grim.

     Us salude. Anute Leonarduzzi 

---