Leturis " di ca da l'aghe "

Centri “Lidrîs Furlanis”

2011-12-10T06:09:00.000-08:00

...

Us informin che a partî dal dì di vuê cheste pagjine e vignarà publicade in:

www.centroraicesfriulanas.blogspot.com

Le cjatarês te Etichete: "Storiutis Furlanis"

A riviodisi.

...

Barzalete

2011-12-05T14:29:00.000-08:00

---

Te vite a son dôs robis che a valin sul seri: la salût e il lavôr.

Jo o soi plen di salût e la mê femine e lavore dut il dì.

Si volìn un grum di ben.

---

Storiutis furlanis: Il barbe Sêf e la cjase gnove

2011-10-11T12:22:00.000-07:00

Il nevôt dal barbe si clamave come lui, dome che la modernitât ai trasformà il non in Bepino. Chest frut lu vevin cressût Melie e Sêf. Al veve simpri sintût a dî che i oms de cjase, dai timps di Cecco Beppe e inmò prin, a jerin simpri lats a vore tal forest. Al pareve che cun lui e jere finide chê di... “Libars ...di scugnî lâ”.

Sêf al jere za anzian cuant che al rivà “L’orcolat”, tal mês di Mai e podopo in Setembar dal ’76. No dome si jere scjassade la vecje cjase dai vons, ma ancje la sô positivitât che chest om al veve viers la vite in gjenerâl. A nd’i veve viodudis di ogni fate e gjenar, ma cheste po lu veve scunît.

Pasâts i moments di balfuerie e confusion, Bepino si de subit dafâ metiint mans ae vore. Il vieli al judave e man man che la vore e avanzave, al someave che ancje al barbe ai mioràs la scusse.

La vecje cjase si trasformave, cirint di mantignî la linie origjinâl, ma il voli espert di Sêf al calumave dai cambis. Ancje al cuviert ai vevin pognets i cops gnûfs, rivâts a chel pont, Bepino al plantà une frascje, ancje se la edilizie no jere gnove des fondis in su, e meretave chel tratament.

Rivà il dì che la cjase e jere pronte, Sêf al jentrà cun rivuart e sudizion, ai detin une cjamarute in plante basse, par no fai fâ scjalis. E someave un tinelut cu la mobilie gnove. Tai prins timps, ai parè di sei un uciel intune scjaipule dorade, ma cun vantaçs, ancje se cun des limitazions.

Une sere clipe e profumade di Mai, Sêf si sentà insom da l’arie, concentrât in alc e distrat dal rest, cjapât in plen a esaminâ e scrutinâ lis riformis fatis. Denant di se al veve il curtîl trasformât intun biel zardinut.

A man çampe, tal sît de stale e dal cjôt, si viodeve il puest pe machine, cun di plui la lissiarie furnide dal implant di riscjaldament, che cumbinave a mandâ aghe cjalde dentri cjase. Tal gjalinâr a vevin fat il cuç dal cjan, tal ronc, li che al jere l’ort, si viodeve un broili di pomârs.

Dutis lis parets a vevin la sô stabilidure, no si viodeve un claut fûr di puest. Il barbe Sêf al sierà un moment i voi: dibot al viodè senis di altris timps, cui vons, cui paris, e la vôs de sô Melie che lu nomenave. - ¡ Sêf, Sêf ! –.

Rosute, la femine di Bepino, lu clamave a cenâ.

---

la traduzion in spagnûl di chest articul si po leile fracant :
http://leturisencastellano.blogspot.com/2011/10/cuentos-friulanos-el-tio-jose-y-la-casa.html
---

La broade in cusine.......

2011-08-27T08:01:00.000-07:00

      Il “Pirona” vocabolari de Lenghe Furlane, cussì la definî:

     Mangjâ popolâr, une vore comun in Friûl, fât di râs di broade, ingarbidis (par un doi mes) tun brentiel cu la trape acide misturade cun aghe.

     In Cjargne, al no ve vignâi, par sei plui adalt dai 400 metris, a metevin i râs te vanzadice dal most di piruçs, che a vevin in bondance, e risultave cetant plui zentîl e delicade di gust che chê fate cu la trape dal vin.

     Preparazion:

     La preparazion tradizionâl de broade in cusine, a impon di meti tune padiele di tiere cuete, il pestât di ardiel, cevole e une fuee di orâr, fasint un disfrit, par cui che i plâs ancje dal ai.

     Si zonte la broade gratade che (une vore impuartânt ) e à di cueisi lentementri par un bon par di oris, fin che cjape il colôr des cjastinis. Bisugne tignîle morbide butantji, in plui voltis dal brut di cjar di purcit, o ancje brut di verduris, al è plui lizêr.

     A part si fas un sofrit di ardiel di music e panzete, evitant il gras siolt e si lu zonte ae preparazion. Al finâl si sminuçâ te broade part dal muset che si veve cuet, il restânt si lu taie a fetis, formânt une curnîs ator dal plat de broade, servî cun polente rustide.
---
Done Bete, amie di chest blog, nus à scrit : “Jo mi visi di cetant ca mi plaseve taià fin fin il râf e mangjâlu crût sparniçât di sâl. O soi lade a tirà fûr il graterâfs, no mi visi se lu veve costruît il nono o gno pari.”
Graciis de tô solite amabilitât. Mandi
---
In cheste fotografie si po viodilu.---

Une poesie...

2011-08-12T19:17:00.000-07:00

LIDRÎS

A lassarin la lôr tiere,

no cjalarin mai daûr,

ma cui voi da l’anime

mai si slontanarin

di chel lûc antîc.

Vecjo sît, di croseris e di popui

di lenghis e costumancis,

che, intun curizûl ardint,

fondintsi a fondarin

la culture furlane.

A rivarin cun ansie e savè,

infondânt lis mans

tune tiere fertil e feconde,

zermoiant tieris e grims,

savoltant cun mans gredeiuses

vecjos dislidrisaments,

spandint sfuarçs e cjants

cun apassionadis sperancis,

popolant cun euforiche ilusion

lis primitivis lidrîs furlanis.

Galliano Remo De Agostini

----

Cheste poesie e je stade presentade te: 2de Mostre di Poetis di origjin Furlan, tal Fogolâr Furlan di Mar del Plata, te: "Settimana della Friulanitá"

Agosto 2011

la traduzion in spagnûl di chest articul si po leilu fracant :
http://leturisencastellano.blogspot.com/2011/08/una-poesia.html

Conte jasidiche

2011-07-21T08:17:00.000-07:00

Un savi just, tal fâ justizie tra doi contendents, lu fasè in presince dai soi dissepui.

Par prin al espon il danezât, spiegant che une des sôs vacjis e jere stade robade, e che il lari lì presint al veve di sei cjastiât par chest.

Il judiç daspò di lungje riflession, al decît che, se lis robis a jerin esatementri come che lis contave, chest om al veve dute la reson.

      Al propon alore di fâ fevelâ l’ipotetic lari…Chest al ricognossè la ladrarie, ma al zontà di vêsi vedût tal oblic di fâlu, i siei fiis a stavin muriint di fan, e che al jere un probleme grivi, intrigôs cjatâ lavôr. A part che il so vicin al jere une vore ric e al podeve spietâ fin tant che ai vês podût paiâi…Il judiç, daspò di vê rifletût a dilunc, i à dât parimentri la reson.

       I dissepui, si son mostrats maraveâts che il lôr mestri al podè concedi la reson a lis dôs versions contraditoris dai stes fats…si lamentarin devant dal lôr savi mestri.
Il judiç ur à rispuindût, daspò di vê meditât a dilunc su la cuestion…Che ancje lôr pûr a vevin reson.
----
     Il jasidisim al è une curiint mistiche dal judaisim che si je disvilupade te Europe orientâl tra i secui XVIII e XIX.
     Se o definìn il paradòs come: “Afirmazion assurde cun aparence di veretât”, cheste narazion e somee esponi che a esistin diferentis formis di “vê reson”, e dutis lôr legjitimis.

---

¿Voaltris cemût le pensaiso?

---

la traduzion in spagnûl di chest articul si po leile fracant :
http://leturisencastellano.blogspot.com/2011/07/cuento-jasidico.html

Idiome e gastronomie

2011-07-06T07:07:00.000-07:00

Tal “Taller de furlan” de Societât Furlane di Buenos Aires, dulà che si riunìn dutis lis joibis des 18 aes 20 oris , no dome o cirìn di “nudrînus” cul “Dizionari Furlan Spagnûl”, ma ancje di gustâsi ogni tant cualchi savôr nostran. Cheste volte al è stât il turni dal lidric ros cu lis fricis. Che tant zentilmentri lu à preparât une nestre compagne di taule, Bruna Nadaia, origjinarie di Lucinîs, in provincie di Gurize.

E ca us lassi la ricete, che par dî il vêr e je une vore semplice:

Si lave par ben il lidric ros, si lu taie e si lu met tune terine. Taiait a dadui une fete di ardiel o panzete, metêtju a cuei tune fersorie cuntun fîl di vueli di ulive, fintremai che a cjapin colôr di rustît, a chest pont zontait une sclipignade di asêt di vin. Atenzion che al è ancje pussibil che la fersorie a cjapi fûc. A chest pont butait il preparât parsore dal lidric. Si po compagnâlu cuntune fete di polente, magari ancje rustide e une buine tace di vin ros.

Mangjâ e murî, e diseve mê none.

------

la traduzion in spagnûl di chest articul si po leilu fracant ca sot :

http://leturisencastellano.blogspot.com/2011/07/idioma-y-gastronomia.html

---

La palisse

2011-06-26T07:43:00.000-07:00

Come che o podês preseâ, cheste e je une piçule trapule a suste, e sierf par cjapâ ucieluçs. In furlan si clame “palisse”.

Cui mei amiis le usavin in epoche d’invier, soredut cuant che al neveave. I mei ricuarts a son une vore precîs, si impirave ta cheste piçule ponte un gran di blave, po dopo le taponavin cun nêf. Si platavin cirint di no fâ rumôr, subit dopo o viodevin des passaris che, ingolosidis dai grans di blave, si svicinavin a lis palissis che o vevin metût, e tac..tac..lis sustis a saltavin e lis afamadis passaris a restavin cjapadis. Si scometeve cui che al varès cjapadis di plui. No ricuardi ben ce che si faseve cun lôr, za che lis passaris no jerin tant preseadis come mangjative.

Viodintlu cumò mi somee une atrocitât, in chei moments no.

---

La traduzion in spagnûl di chest articul si po leile fracant ca sot :

http://leturisencastellano.blogspot.com/2011/06/trampera-para-cazar-pajaritos.html

---

Flore e sô sûr Nute

2011-06-06T09:55:00.000-07:00

Al jere un paisut in fonts de val di pocjis animis e coronât di montagnis. Al faseve plasè cjalâlis, sblancjadis di nêf tal Invier. Zermoiant in Primevere. Verdis e vivarosis in Istât.

Al dave gust lâ tal bosc a racuei chel che la nature e ufrive.

Di simpri, la int dal puest si jere sierade tal chel “paradîs”, parint che no vessin bisugne di altri, magari cun pôre di pierdi chel lûc paradisiac. No ametevin che si inzontassin personis di gjeniis e gjeografiis diviersis.

I matrimonis si formavin simpri tra familiârs. In struc al jere un grup sociâl di parincj di sanc.

Us contarai la storie di Flore, une zovine di 15 agns. Une dì e sparì cun sô mari. Al jere il mês di Mai, la nature e sflurîve. In famee a diserin che a jerin ladis a cjatâ une pariint malade, no si saveve cuant che saressin tornadis.

Tor Nadâl lis dôs feminis a tornarin. La mari, soredint, e puartave une frutine in braç. La piçule di pocjis setemanis si clamave Catinute, ai disevin Nute.

In pocjis peraulis e pandè, che la pariint si jere rimetude e che jê intant che si cjapave cure de viele, e puartave indevant la sô gravidance. Flore e disè di sei contente di vê une sûr.

Agns dopo, Flore si spose cun Bepo. La none di jê e il nono di lui a jerin cusins drets. A forin in viaç di gnocis a Triest. Sot sere a tornarin, la famee ju spietave cuntun mangjâ di gnocis.

La vite e lave indevant e lis stagjons ancje. Flore no jere rivade a concepî e si le viodeve une vore leade a sô sûr Nute, tun rapuart tacadiç e di stime.

Une dì la mari di Flore no à volut alçâsi dal jet, e partive. Radunant la parintât par cumiatâsi, si jemplâ subit la cjase. Tai soi salustris e veve une peraule par ducj, ancje se cualchidune no si le capive.

Rivât il turni di Flore, si cjalarin tai voi, e ai disè: - Fie, viôt di Nute, ten cont di jê.-

E a Nute sunsurant e je rivade a dî: - Vueli ben ae Flore, jê e je, jê e je, - cussì la viele e partì.

Nute cjalant a Flore e viodè dôs lagrimonis cori pe muse patide. Dopo cuasi cuarante agns la veretât e je emerzude.

Le cjalà drete tai voi volìnti berlai – ¡¡ Mame !! - ma nissun sun al saltà fûr.

Un grop ai sierave il cuel.

---

La traduzion in spagnûl di chest articul si po leile fracant ca sot: http://leturisencastellano.blogspot.com/2011/06/flora-y-su-hermana-nute.html

---

Palmire la poleçarie

2011-05-23T08:16:00.000-07:00

Al cjar di Palmire, si lu viodeve che al avanzave dret e sigûr, pal stradon che al puartave in paîs, in chel dì al jere il marcjât des bestiis.

Man man che al leve svicinantsi, si podeve viodi il contor dal cjar e de marcjanzie che al puartave. Al jere cjariât cun stiis leadis une cun l’altre, plenis di polam di ogni gjenar e fate.

Palmire, in pins sore il cjar, sostignint redinis e scorie, e stimolave chel sbols di cjaval a cjaminâ. Tal sô avanzâ la femine e someave un gjenerâl, che al puartave presonîrs ai nemiis caturâts.

Cheste cristiane si merete dôs peraulis: Palmire e jere un bocon di femine grande e gruesse, si meteve ciprie su la muse e su la part dal cuel che si viodeve. Di tant cjamâ e discjamâ il cjar e veve dôs manonis, che no dome ai servivin par lavorâ, ma ancje par difindisi.

Istât e Invier e puartave simpri un façolet sul cjâf, di une tele rosse a rosutis, no lu ingropave sot il barbuç, ma parsore, dongje di une orele, di sot ai vignivin fûr cuatri piniis biondis e smamidis pes tantis ploiis e solions, che e veve cjapât.

Rivade te place dal marcjât e disponeve in biele mostre la marcjanzie a vendi, e veve clients cun diviers bisugns: chei che volevin une gjaline par fâ un bon brût, o ben par rinovâ il gjalinâr, altris un gjal caporion, o pûr un cjapon par mangjâlu. Sui presis e jere une brave comerciante, e domandave seont la muse dal client, se chest al protestave ai faseve un scont.

Finide la vendite e cjariave dut di bessole, si le viodeve strache e sudade pe fadie, po si meteve in viaç, prin di lassâ il paîs si fermave te ostarie di Mariute Sperance, lassant cjar e cjaval daur te androne, jê e jentrave par une puartele secondarie, si sentave sot il bersò vicin de lobie.

Mariute, bielzà e saveve ce che e veve di puartai: mieç di neri e sentâsi un moment cun jê. Palmire ai contave lis vicendis de zornade, intant che il sudôr i spissulave pe muse, ai leve trasformânt tun vêr pastiel la ciprie mote di sît. Une volte finît il mieç di neri, e partive contente e legre.

-------

La traduzion in spagnûl di chest articul si po leilu fracant ca sot :

http://leturisencastellano.blogspot.com/2011/05/palmira-la-vendedora-de-pollos.html

---

La confession

2011-04-22T18:53:00.000-07:00

Serafin al jere un zovenut che al puartave ancjemò i bregons curts, si fevele dal subit dopo vuere. Al jere saldo cuntune sclibe di mularie, che a levin torzeonant pal paîs, se vevin ocasion di fâ dispiets, lu fasevin, us doi un esempli: a vevin cjapât di smire il puartonut di une cjase che e veve il campanel, le misurarin pe bande largje, daspò si procurarin un mani di scove, cuntune ponte a fracavin il boton e chê altre le incjastravin te part opueste dal telâr.

I parons di cjase a vivevin tal prin plan, sintint sunà il campanel a vierzevin un barcon e vosant a domandavin: – ¿cui isal? -, al no otignî rispueste a cjalavin dabàs viodint il mani de scove, imagjinaitsi voaltris il rest, intant che la mularie platade tal angul de cjase, si tignive la panze dal ridi.

Une dì, un de scuadre al rivà cuntun mieç pachet di spagnolets “Nazionali” strafuîts a so pari, si derin subit da fâ par impiâju, ce fumere!!. I àn ufiert ancje a Serafin, si viôt che la bugade e je stade penze, che al scomençâ a vê inzirli e a tossi. A partî di cheste “trasgression”, Serafin al sintì un sens di colpe e di no vê la cussience nete.

La sabide al veve di confessâsi e al pensà di fâle cul Vicjari, prin, parcè che al jere dûr di orele e secont, al veve simpri premure, tierç, no ti viodeve in muse, ju separave un barconut sierât cuntune gridele. Serafin, inzenoglât e tremant ai conte il “pecjât” de fumade, si spietave di sintîsi a dî: - no sta fâlu plui!-, invezit al ricevè une antifone di improperis, Serafin al scjampà vie di corse cence savê se i veve dât la assoluzion.

Tal doman, domenie, al veve di cjapâ la comunion (sugjeriment de none) ma tal dubi di vê ancjemò il pecjât intor, al decidè di confessâsi di gnûf, cheste volte cul zovin Capelan, (come che lu faseve simpri) e cu la muse scuvierte ai conte il fat. Riduçant, il predi al alçà la man diestre fasint la segnâl de crôs e disint “Ego te absolvo in…”

Serafin al scoltâ si sintì liberât di un pês che lu tormentave bielzà da un pâr di dîs.

---

la traduzion in spagnûl di chest articul si po leilu fracant ca sot :

http://leturisencastellano.blogspot.com/2011/04/la-confesion.html

---

Sale di bal

2011-04-09T15:51:00.000-07:00

La seconde vuere mondiâl e jere finide, la vite si ripiave e la int, dopo tantis cjaristiis, a voleve ancje divertîsi.

La famee di Catinute, che e veve une cjase cuntune grande verande, cun capacitât di podê ricevi une cuantitât di int, e scomençà a organizâ fiestis di bal lis sabidis e domeniis, cence tantis pretesis musicâls: une armoniche e un liron.

Cun chest a vevin cjatât la “glagn de madasse”, chê di tirâ dongje cualchi franc cuntune improvisade “frascje”, te cuâl a vendevin un taiut di vin ai balarins, che te polse dai sunadôrs, a levin tal curtîl a cjapâ un poc di aiar.

I musiciscj pûr a cjapavin un compens.

A jerin seradis dome pai adults. I zovenuts, cun voie di balâ, a dovevin contentâsi cjalant pai barcons, viodint il divertiment dai altris.
Tal borc e jere une sdrume di zovins tra cusins e amis, si leve dai vot ai cuindis agns. A jerin in chês etâts dulà che lis ideis a buligavin.

Parcè dome i grancj vevino dirit di un svagament?
Tal trop de mularie al jere Nando, un dai grancj dal grup, al steve imparant a sunâ l’armoniche. Il puest par balâ za lu vevin, al jere il cjast de cjase di Lene.
A deciderin che la domenie dopomisdì tor lis trê, al jere il moment just par petâ cuatri salts. A forin a netâ il pues ingrumânt i strafaniçs. Nando ae ore fissade al jere sul puest, preparant il senari, dongje un barcon par vê lus naturâl, viert il letorin cui spartîts sore, a mancjavin i balarins par scomençâ.

In pôcs minuts a rivarin, oh!!! sorprese, a jerin dome frutis, ogni volte che si vierzeve la puarte dal locâl, ducj a cjalavin in struc, ma i mascjuts no rivavin.
A un ciert moment, Lene, la parone di cjase, ai disè a Nando: - su, su, scomence -. Cence fâsi ripeti, il sunadôr al tacà cun “Tintine tintone”.

Di colp dut al cjapà vite, si impiarin i lusôr, il solâr si trasformà tune vere sale di bal, il rivoc dai suns te stanzie vueide al jere dut un spandisi, un sparniçâsi, metìntsi pes fressuris dal stabil.
Lis frutis cence bati cee e cence discriminazion di: etât, colôr e pês, si divertivin in cubie, a someavin un scuam di paveis svoletant ator ator il vecjo solâr.

la traduzion in spagnûl di chest articul si po leilu fracant ca sot :

http://leturisencastellano.blogspot.com/2011/04/salon-de-baile.html

---

Storiutis furlanis:"Camilo" e la malatie di Zuan

2011-03-24T11:27:00.000-07:00

Zuan unint i compuartaments di Camilo, al rivà ae conclusion che la bestie si steve umanizant. Dimostrant lis virtûts e i difiets dai umans, si po ancje dì che, in tancj aspiets de sô personalitât ju magnificave. Us contarai un fat: o viodarês cetante gjenerositât che al manifestave viers cheste persone.

Chê buinore Zuan si sveâ, no sintintsi ben al decidè di restâ tal jet, sfuarçantsi par lassà la puarte in sfrese. Ae solite ore Camilo al jere devant di jê, viodintle vierte al dubitâ un moment, podopo al jentrà cjatant il so amì tal jet. Dopo curts atims di maravee si svicinâ poiânt lis çatis parsore dal jet. Zuan lu viodè par un atim alçânt i voi, che subit ju sierâ.

Il cjan cun decision, al jessì svelt, tornant cun des personis de aziende, che cun premure a tornarin cul miedi.

Bielzà passade une setemane dal fat, no je stade fuarce umane in grât di gjavâ dai pîts il fedêl cjan, a àn sielt di meti une cuvierte tal paviment de cjamare di Zuan. Li al durmive durant la gnot, simpri vigjil a cualsisei rumôr che al podès vignì dal malât. Durant la zornade, al jessive dai moments dome pes sôs necessitâts, tornant si pogneve tun cjanton de abitazion.

Durant la convalessence di Zuan, Camilo no lu à lassât mai di bessôl, sospindint i zucs, lis cjaminadis e ogni altre ativitât relazionade cul malât. Un biel dì al tornà cu la balute di gome mastiade, a tornarin gradualmentri a lis cjaminadis,e a sei sveât a buinore. A jerin tornâts ae normalitât. Cence dubi l’ategjament di Camilo al jere penetrât in profonditât in lui, si sintive in debit pes atenzions ricevudis.

Il cjan, cul sô nulôr, al capî la solitudin di Zuan, che lontan de sô famee al jere disprivât dai afiets prossims, par chest lu veve elet ufrintji la so compagnie, ma al stes timp domandantle. No àn mediât peraulis su chest vê e dâ, dut al è avignût cun dai mots, des cjaladis e tante, dedicazion, des dôs parts.

La traduzion in spagnûl di chest articul si po leile fracant ca sot :

http://leturisencastellano.blogspot.com/2011/03/del-triptico-camilo-y-su-amigo-juan-3a.html

---

Storiutis furlanis:“Camilo" e la sô famee

2011-03-11T14:36:00.000-08:00

     Il cjan al decideve cuant puartâ Zuan a spas, di resint si presentave cul sguinçâl in bocje, lassantlu ai soi pîts e cjalantlu dret tai voi, une cjaladure suplicant e autorevul, emetint des baiadutis, nol valeve la pene fevelai par disi, – cumò no pues -. Cun pazience francescane al rivave al fin de sô mission. Istituint un dì si e chel altri no, di fâ la grande spassizade, che durave cirche trê oris.
       Camilo si inviave pe strade che puartave in sù, Zuan, sostignint il sguinçâl al veve dome di lai daur, bielzà savint dulà che lu varès puartât. Rivâts ad une intersezion, si viodevin dôs stradis, il cjan si fermave un moment, meditant cuale cjapâ, se mai rivâ fin ae planure di adalt, un puest par altri une vorone interessant,cuntune vision panoramiche di lassâti cence flât. Li si pogneve dongje une bancje di len, po dopo al cjalave Zuan movint ritmichementri la code, lu stave invidânt a sentâsi e a gjoldisi la nature che ju circondave.

     Une dì che levin a fâ il solit zîr, Zuan al viodè che nol cjapave la strade di simpri, incuriosît si lasse menà, lant par une scurte scognossude, jentrant tun bosc di laris, jessint fûr tune estension plane, si viodeve une cjase coloniche contornade cuntune alte cise.
     Camilo al avanzave sigûr viers il puarton de jentrade e al varcâ il soiâr, al pareve cognossi ben il puest. Zuan, al restâ fer cjalantlu cori, tal curtîl al jere dut un va e ven di bestiis e personis. Al someave che ducj a savessin e a cognossessin il visitadôr. Dai zovins lu clamarin pal so non, ma il cjan al continuave cence cjapâ at, fin a rivâ ae cjasute dai cjans, di li a vignirin fûr trê piçui pastôrs todescs, dongje si viodeve une cjice de stesse raze, che pareve no alarmâsi di chê visite.

     Zuan, dantsi a cognossi al jentrà lant viers Camilo, che al viodilu si je fat dongje baiant alegrementri invidantlu a svicinâsi, intant lui al zuiave cui soi piçui.
     Viodint cheste sene, Zuan al capî il dret de madasse, si ricuardave che timp indaûr, il cjan al jere discomparît une matine, tornant dongje tor sere, cence dâ a intindi propri nuie.
---
     La traduzion in spagnûl di chest articul si po leile fracant ca sot :

http://leturisencastellano.blogspot.com/2011/03/del-triptico-camilo-y-su-amigo-juan.html

---

Storiutis furlanis:“Camilo” e il so amì Zuan

2011-03-02T07:40:00.000-08:00

Si clamave Camilo, il non jal veve metût la vecje parone (réquiem), in ricuart di un omonim precedent. Al jere un cjan pastôr todesc, che al veve sielt come so “alter ego” a Zuan, un dai tancj umans che lavoravin tun grant albierc, che si cjatave ae rive dal Lario.

Tai ultins timps si viodeve un cambi une vore evident tra Camilo e Zuan.

Dut al filave tai soi binaris, il rapuart si jere lant rinfuarçant. Si viodeve une spropositade esigjence dal animâl, come di lâi daûr dut il timp, di cirilu in cjamare sô sgrifignant te puarte, pognintsi in spiete se no lu cjatave. Al domandave rispiet sui timps dal mangjâ, des spassizadis e dai zucs.

Ancje sui divertiments nol leve pes curtis, Camilo al veve une balute di gome dute muardude, ai bastave viodi a Zuan leint il gjornâl, che si presentave cun chel roseum di gome, depositantlu ai soi pîs, menant la code e vuacânt, come se ai fevelàs par disi: - su po, anin a zuià -.

Zuan al scugnive tirâ la balute il plui lontan pussibil, il cjan corint daûr di jê al tornave subit cul trofeu, pognintlu di gnûf ai soi pîts in continuazion.

La resistence umane a chest invît e pierdeve autoritât tal dineâsi a chestis propuestis. Biel lant tal timp e intune situazion come chê descrite, Zuan fasint finte di lei il sfuei, al acetave di partecipà al zuc che, si trasformâ intun spietât dran dran di ogni dì.

E di dì in dì, Zuan al cjapave cussience che, al jere stât l’animâl a sielzilu come so custodi, cun la incjarie e la decise sutilece “cjanine”di educâlu te miôr forme pussibil.

O savin che Camilo, dutis lis zornadis e cence rispietâ ni domeniis ni altris fiestis, a siet di buinore, si plantave devant de cjamare di Zuan, dant fuarts colps cu la çate su la puarte, se nol otignive rispueste, al veve la delicatece di spietâ curts moments, tornânt al atac cun maiôr slanç, rivant al obietîf desiderât.

Cul pasà dal timp, Zuan si domandave se al fos il câs di fevelâ cun cualchidun di ce che i passave. Pûr lant a durmì tart, si sveave simpri tor lis siet di matine.

Saraie pe educazion di Camilo?.

---------

la traduzion in spagnûl di chest articul si po leile fracant ca sot :

http://leturisencastellano.blogspot.com/2011/03/del-triptico-camilo-y-su-amigo-juan-1ra.html

---

Storiutis furlanis:Il barbe Sêf e la purghe

2011-02-21T07:00:00.000-08:00

Il barbe Sêf al jere un furlan di altris timps. Pocjis voltis si jere mot dal paisut dulà che al jere nassût, si lis podeve contâlis cui dêts di une man. La ultime volte e je stade cuant che lu àn puartât d’urgjence tal ospedâl.

E savêso parcè?. Al veve di lâ a gnocis de fie di un copari e savint che sarès stade une fiestone, al varès fat une sbultricade, une mangjonade, che di sigûr si varès fevelât par un grumon di timp in paîs.Cussì al è stât che, un par di dîs prin si presente in speziarie, dulà che ducj lu cognossevin e no par sei un client.

- Alore Sêf – i dîs il speziâr.

- Dotôr, o varès bisugne di cjolimi une purghe, o ai necessitât di liberâ il stomi, cumò che ven la primevere

Il speziâr, dantji une butiliute lu racomandà di cjoli un gucjarin prin di lâ a durmî e no di plui, senti un purgant une vore efetîf. - Si, si Dotôr – ai dîs Sêf – che nol si preocupi lui.-

Rivât a cjase, e volint rispietâ al speziâr come che ai veve dit, al puarte la butilie ae bocje par dai un cluc, e cui sa, ce che i passà pal cjâf in chei moments che, alçânt il comedon le fas fûr dute, netantsi a continuazion i lavris e i mostaçs passantsi la manie de cjamese, po si met tal jet sperant di podê durmî, e che tal doman al varès vût l’efiet tant desiderât.

Vie pe gnot si svee cun tun malstâ gjenerâl, voie di butâ fûr, inzirli e tante pôre, che fos rivade l’ore di lâ a fai compagnie a Melie, la sô femine, (requiem).

Come che al po si met a clamâ al nevôt Bepino, che, viodint la butiliute vueide e il stât dal barbe, al tache urgjent il cjaval al saret, al cjarie l’om buluçat tune cuvierte, e movint la scorie su la schene dal puieri, a rivin te sale dal pront socors, al ven ricoverât d’urgjence, il nevôt al à passat la gnot intune bancje de sale d’aspiet.

Tal doman lu informarin che Sêf si jere salvât par un pêl: lu vevin operât durant la gnot, al veve une apendicite convertide intune peritonite, graciis al purgant che i veve acelerât e sveltît il procès. Cheste aventure e à vût il so presi, nol à podût assisti aes tant desideradis gnocis, e al tant desiderât bacanâl gastronomic.

---

La traduzion in spagnûl di chest articul si po leile fracant ca sot :

http://leturisencastellano.blogspot.com/2011/02/del-triptico-el-tio-jose-la-purga.html

---

Storiutis furlanis: Il barbe Sêf e la pension

2011-02-07T10:18:00.000-08:00

Pocjis voltis il barbe Sêf al jere lat in citât, al diseve che nol leve par no intosseâsi cundut chel cjalâ il diaul, chel berghelâ de int, e chel desio sot dai sotpuartis di Marcjât Vieri. E al zontave che l’aiar dal paisut al jere plui san, pôc moviment, cualchi biciclete, pocjis machinis: chê dal dotôr, dal podestât e dai siôrs de vile.

Cuant che Sêf si dismoveve, si sclarive daur de mont de bande di Muris. Melie, la sô femine no steve tant ben, il miedi condot ai veve conseât di polsâ di plui, par chest Sêf, al saltave fûr il prin, cidin, cidin, al lave in cusine sgarfant te cinise in cercje di boris, cun cuatri stecuts al cumbinave un fugut, metiint sore la cogume, scjaldant il cafè di vuardi, i puartave une scudiele ae sô Melie, che lu beveve come sal fos un balsim.

Jê, che jere simpri stade in prime linie cu lis voris di cjase, si sintive confuartade des atenzions dal sô om. Agns, agnorums che Melie i vignive ripetint, - Sêf, tu varessis di lâ in citât tal ufici pensions!! . Il dì di doman no ti vignaressino ben chei cuatri francs ? -.

- Si femine, vuê no pues! – cussì il timp al passave.

Une dì Melie cence visâ a dinissun e je partide, fasint chel viaç cence tornade, lassantlu a Sêf, avilît e spaurît.

- Bisugne che i fasi câs a Melie -, al pensà. Finalmentri si decît e compagnat dal nevôt Bepino al plombe in citât. L’ufici al jere tun plan adalt di un palaç, par rivà a vevin dôs pussibilitâts: fâ lis scjalis, o cjapâ chel tramai di gabiot che ti mene su tun marilamp. Sêf, fasìntsi la segnâl de crôs, al cjapà l’assensôr.

Rivâts tal ufici, Sêf al jentrà zirant il cjapiel jenfri lis mans disintjur:

– Bon gjorno -, - Si sieda pure- si sint rispuindi, Sêf si sentà dongje di une siorute ben metude cun tant di cjapiel, velete, borsete e guants, cheste e scomençâ a fevelâi, disìnt : che ca, che là, che sot, che parsore…. Puar Sêf!! Nol capive nuie di ce che ai diseve.

Plui tart, finide la pratiche, il nevôt ai domandâ a Sêf:

-¿ Ce disevie la Siore? –

- Ah…e à fevelât une vore ben-.

- ¿E ce ti aie dit?- Sêf ai rispuint:

- Ma, cjale mo, chel po no lu sai…! E fevelave par Talian! –

…

La traduzion in spagnûl di chest articul si po leile fracant ca sot :

http://leturisencastellano.blogspot.com/2011/02/del-triptico-el-tio-jose-la-jubilacion.html

Storiutis furlanis: Il barbe Sêf e Melie

2011-01-30T07:25:00.000-08:00

Il barbe Sêf, a Melie, la sô femine, le clamave la mê cristiane, no vevin vût dissendence.

Lui al à lavorât une vite tal forest, in Gjermanie, in Svuizare e ancje tal Canadà, si palesave, che nissune fantacine di chei paîs lu veve brincât.

Pussibilmentri al veve tal cjâf chê di fasi une famee in paîs. Cuant che al è tornât a stabilîsi, al veve bielzà cuarante e passe agns. Si riunî cun Melie che si cognossevin di piçui. Ancje jê, tal sô, no veve vude fortune cui oms, forsit par dedicâsi ai paris bielzà maiôrs e ai cinc fradis mascjos, che a forin sparniçantsi pes Americhis.

Melie si cjatave tune etât, di no podê pretindi tant de vite, si, in cambi cjapâ come un don se alc ai capitave.

Cussì Sêf e Melie si derin dongje, cu la sperance di compagnâsi dut il timp che la vite ur varès dât.

Un nevôt di Sêf, di non Bepino, restât vuarfin piçulut, al è stât il frut che no vevin vût, lu àn tirât su come un fi propri, il piçul al rispuindeve ben ai lôr sintiments di barbis e paris adotîfs.

Lis stagjons a lavin sucedìntsi. Al è simpri stât cussì, l’Invier al jere lunc, ai Sants al faseve frêt, si saveve, cun pazience dutis chês nêfs, chês ploiis, chês fumatis, a saressin man man ladis vie, dant pas a une timide primevere. Lis zornadis si slargjavin clipantsi, a spontavin piçulis flôrs. Bisugnave lavorâ, savoltâ la tiere, semenânt par dopo racuei, cuant che al rivave il so timp.

I mês d’Istât a vignivin cun zornadis scjafoiadicis e pesantis, cun temporâi di lamps e tons, mandant ju aghe a selis, che puartavin padin ae canicule e ae scjaldade atmosfere, par Madone d’Avost, a disevin: la prime ploie e rinfrescje il bosc.

Partint di li e scomençave une des plui bielis stagjons, l’Autun, soredut Setembar e Otubar, epoche di vendemis, cun zornadis claris e netis, e gnots forsit fredulinis, che za a levin volint cjatâ di gnûf il frêt Invier.

E insiemi cu lis stagjons, a levin passant i agns: Melie, Sêf, la cjase, e dut chel che al circondave, a jerin une sole entitât, za no si saveve cui che al jere un o l’altri. Dut e ducj a vevin la stesse filusumie.

...

La traduzion in spagnûl di chest articul si po leile fracant ca sot :

http://leturisencastellano.blogspot.com/2011/01/del-triptico-el-tio-jose-jose-y-amelia.html

---

Lis sûrs Menie e Luzie 2de. ultime part

2011-01-19T14:31:00.000-08:00

Dutis lis domeniis dopo messe, jo o colaboravi cun la parochie, insiemi cun altris fruts, pe distribuzion dal setemanâl “La Vite Catoliche”.

Mio fradi, metintsi i bregon luncs, mi veve passât i soi “clients”, tra di lôr o vevi ancje lis dôs sûrs, cussì o ai vût mût di jentrâ in chê uniche stanzie di un secont plan, fasìnti un pâr di rampis di scjalis, e un larc coridôr, dulà che lis vecjis trâfs a fasevin cric croc.

Cui miei pocs agns mi soi spaventât a viodi in muse la miserie, ma par chê dì a jerin rivadis a meti di bande, chês cuatri palanchis par comprâsi il setemanâl,

O soi rivât a viodi ancje il ledrôs de medaie, i puartavi pûr il gjornâl a une siorete, che dal prin plan de sô vile, mi mandave ju un zeut tacât tune cuarde cui bês dentri, al jere par no fa lis scjalis, dôs situazion, come il dì e la gnot.

E par finì cheste piçule conte di Menie, ûs disarai, che lis dôs sûrs a levin pai negozis e ostariis dal paîs a domandâ.

Ancje se tes parets des cjasis tu viodevis des tabelis, tacadis, che disevin: “In questo paese è proibita la questua ”dit par furlan: in chest paîs, al è proibît pitocâ .

Leç, che nissun al rispietave devant de miserie, za che gjeneralmentri ducj ur davin alc.

Luzie e jere la plui timide, in cambi Menie e jere une femine plui risolude.

Mi ricuardi che te ostarie di Marie, clamade “Sperance”, e domandave mieze taçute di vin, disint che le varès paiade cuntun biel cjant, za le cognossevin, che podevin fale contente cun tant pôc, dopo vele bevude, e cirive di intonâ... cuntune vosute magre e piçule, come la sô persone, che diseve:

“A no ‘nd è mai stade ploie

che il bon timp nol sei tornât”.

Dit in altris peraulis: - Simpri che a la plot, al è tornât il biel timp -.

----

La traduzion in spagnûl di chest articul si po leile fracant ca sot:

http://leturisencastellano.blogspot.com/2011/01/las-hermanas-menie-e-luzie-2da-y-ultima.html

Lis sûrs Menie e Luzie 1me. Part

2011-01-14T10:40:00.000-08:00

Il so non al jere Domenie, ma ducj in paîs le clamavin Menie. E jere une femenute magre come une canocje di sorc, no plui alte di une scove metude in pins.

La veretât, ce puedio dì, tornant indaûr cui ricuarts le ai simpri viodude come une none di altris timps, no come lis nonis di vuê, par capîsi.

Menie e sô sûr Luzie, che someavin zimulis, a vivevin tune stanziute di un secont plan, la cjase e jere proprietât dal Comun…..

E come dutis chês altris fameis che a vivevin tal stes stabil no paiave il fit, par sei anagrafiche e economichementri misaris. Us pues sigurâus che comoditâts a no’nd jerin ni pocjis ni tropis; fasint une liste di prioritâts minimis: il gabinet o necessari, secont che o volès clamâlu, si lu cjatave tal ronc daûr cjase tun gabiot, cuntune buse tal mieç, e cuntune puarte che ai mancjave une bertuele.

Imagjinaitsi ta chês zornadis di criùre, scugnìnt jentrâ ta chel gabiot; par diplui l’aghe a vevin di tirâle su dal poç che al jere tal mieç dal curtîl, ce che veve di positîf cheste aghe al jere che durant l’istât ti calmave la set par buine e frescje.

Volint slungjâsi in altris detais dai altris bisugns, baste savê che la cjase in cuistion, gjestionate dal Municipi, si le clamave “Il Ricovar”.

Dôs peraulis ancje par dì cemût che si vistive cheste tribulade femine: il so vistiari principâl al jere une cuvierte che le usave a mo di cotule lungje, taponantsi par ben de vite in ju fintremai ai pis, par che no i colàs le sierave cuntun biel pontepet. E de vite in sù e veve simpri cualchi gjachete di om, ancje di cualchi numar plui grande .

Dispès si le sintive che e diseve une frase afermative, “Mile, e non piú mile, in chê buse o vin di finîle”, une frase sibiline che someave un fulmin di oracul: seont Menie, la umanitât no sarès lade oltri il XX secul…

....

La traduzion in spagnûl di chest articul si po leile fracant ca sot:

http://leturisencastellano.blogspot.com/2011/01/las-hermanas-menie-y-luzie-1ra-parte.html

---

Nadâl in Argjentine

2010-12-22T14:05:00.000-08:00

In Argjentine la fieste di Nadâl e jê come che o fossin in Europe, val a dì cence fâ fidance che tal Nord al è Invier e ca tal Sud al è Istât. Si continue mantignint i ûs e usancis che i nestris nonos a puartarin dal vecjo continent. O sin unevore conservadôrs des nestris lidrîs, costums e culture.

Come esempli, l’imagjin di Nadâl nus mostre i pins decorats cun nêf e a “Babbo Natale” cul so tradizionâl vistiari adat a temperaduris sot zero.

Te gnot dal 24 di Dicembar (Vilie di Nadâl) si consume aliments e bevandis no idonis pe epoche, za che il clime estîf nol è compatibil cul ingjerî tantis caloriis.Tal doman 25 di Dicembar si va indevant cundut chel disordin culinari, continuant a bevi, mangjâ e festezà.

Doi agns fâ mi cjatavi in Friûl par un 25 di Dicembar, intervignînt a un gustâ di Nadâl in cjase di parincj, issint chest il gustâ di gale. Al veve neveât la gnot prin e la temperadure e jere di variis grâts sot zero. O jerin riunîts ator dal fogolâr, un çoc di len al brusave fasint comut l’ambient. Une schirie di prins e di seconts plats, ognidun cul so vin. Formadis, robis dolcis, cafè e becjarins. Par ultin ducj ator dal arbul di Nadâl, disfant i pacs dai regâi.

Tancj auguris di une buine gnot di San Silvestri e un prospar An Gnûf.

---
La traduzion in spagnûl di chest articul si po leile fracant ca sot :

http://leturisencastellano.blogspot.com/2010/12/navidad-en-argentina.html

---

"Il Cjanton di Anute" Gno nono Elie Luch

2010-12-02T09:45:00.000-08:00

Cuissà di ce gjernazie che al vignive chest cognon, o ai simpri savut che al jere di Sante Marie la Lungje, sposant me none Isidore Tavano, di Sclaunic.

La ultime tape le àn fate a Bunzic, comprantsi cjase e cjamps, tirant su sîs fîs.

A vevin ostarie, coloniâi, zuc di balis. Te stale, cuatri vacjis, doi cjavai, dut al filave par ben…fintremai che il diaul al à metude la code. None Isidore tun moment e je partide cul Signôr, un tetan, e veve 45 agns.

Mancjant il tamon al mancje dut, i frutaçs si sbandarin gjoldint la libertât, metint man te casele. Il nono, no savint frenâ a timp, al è restat bessôl, i mascjos a partirin pal Belgjo, altris pe Argjentine; lis zovinis si son sposadis, restant il nono cuntune fie vedrane e maladice.

Unevore religjôs, nol sopuartave sinti blestemà, purtrop te ostarie al scugnive tasè e gloti…in chei agns in Friûl si blestemave.

Tal paîs lu clamavin “Lio”. La sabide al leve a Spilimberc e il martars a Codroip a comprâ chel che i coventave pe buteghe e pal tabachin, al comprave ancje besteam.

Il negozi al scomençâ a sbandâsi, nol lave ben, al veve debits, si sintive ancje strac, cussì al decidè di dai la responsabilitât a une fie sposade. In pôc timp il cuc si e fat paron di dut, e lui paron di nuie, par altri odeât dai altris zinars e criticât in paîs. Al à paiat cjar chel fal…puar nono.

La vecjaie le à passade mal, sierât in cjamare, sofrint, preant, mancul mal che al jere religjôs, al saveve perdonâ.

O ricuardi che al vignive in cjase nestre disìnt ae mame: -¡! Nene, chest an al è l’ultin ¡! -. Ma cu la sô grinte al è rivât ai 96 agns…

A Bunzic o vin vût Plevans che duravin pôc, il nono al faseve il “predi”, intant che il Vescul al pensave cui mandâ. Ce biele vôs che al veve, al intonave propit ben di alt, ducj i fruts e il femenam fasìnti cor, ce cjantadis, si començave dentri glesie finint in place. Pecjât che nol podeve dî messe, si altris funzions: il rosari tal mês di Mai, jespui la domenie, insiemi al muini Emili.

E cun San Pieri, a varan montât un cor, par cjantaitji lis laudis al nestri Creadôr.

Il Dì de Musiche

2010-11-22T05:23:00.000-08:00

Il 22 di Novembar di ogni an il calendari de glesie Catoliche al celebre a Sante Cecilie, muarte a Rome, vergjin e martare, tal an 230 dC.

Nomenade Parone de musiche dal Pape Gregori XIII tal 1594, cheste zornade e je stade universalmentri adotade come il Dì de Musiche. Al finâl de Ete di Mieç, za si rapresentave a Sante Cecilie sunant l’orghin, l’arpe o cjantant. La umanitât e je lade venerantle a traviers dai secui.

E ancje un 22 di Novembar al è nassût il Cuartet Vocâl Armonie, il sô percors al è stât ricognossût no dome tai ambients furlans. Si è iniziat in cjase dal Mestri Rodolfo Kubik sint incoragjâts dal stes.

Stant che o vin menzonât al Mestri Kubik, us informìn che ai 27 di Novembar a Dignan e ai 3 di Dicembar a Roncjis dai Legjonaris, a tornaran a presentâ parts de sô comedie “Va vilote puartade dal vint”.

La regjistrazion dal conciert precedent si le cjate fracant ca:

www.youtube.com/admmartignacco

--------

la traduzion in spagnûl di chest articul si po leile fracant ca sot :

http://leturisencastellano.blogspot.com/2010/11/el-dia-dela-musica.html

---

La Meridiane

2010-11-16T06:59:00.000-08:00

"UMBRA NON TEMPUS REDIT”

E torne la ombrene

La ore e je la stesse

Ma no il timp
---

La meridiane de foto e jo o sin nassûts tal stes an, “tai taitants e cinc”.

Ancjemò al dì di vuê si pues viodile vive e svearine soredut tai dîs di soreli. E je instalade tal mieç de façade di un palaç in stîl neoclassic a forme di ele che si cjate tal centri dal paîs.

Ducj i dîs par agns o soi passât devant di jê, biel lant a scuele, biel lant in glesie, o semplicementri biel lant, mi plaseve fermâmi devant e cjalâle, soredut a misdì par viodi se l’ombre e colave just sul numar dodis che si cjatave tal mieç dal semi circul.

Come riferiment o vevi ae mê drete il tor de glesie, che oltri a viodi lis dôs gusielis poiadis parsore dal numar XII in Roman, o sintivi lis dodis scjampanadis sunâ cun tante fuarce, che al pareve si spacàs il cjampanili in doi.

La concuardance cun la meridiane si dave simpri e cuant che, l’orloi dal tor al fos stât programât cun la ore solâr, di no sei cussì lis speris dal cjampanili e podevin sei su lis undis o la une, e parcè no ancje lis dôs dal dopomisdì, atitudins dai oms volint modificâ lis robis, bielzà o savin che, dopo che “mont al è mont”, la nature si je simpri regolade de stesse maniere.

------

La fotografie de Meridiane dal Palaç Cosani di Tresesin

e je une zentilece di: Roberto Tiezza e Priscilla De Agostini

...
La traduzion in spagnûl di chest articul si po leile fracant ca sot : www.leturisencastellano.blogspot.com/2010/11/la-meridiana.htlm
...

Il pietin

2010-11-10T05:46:00.000-08:00

Serafine dai “cramars” e Gjeremie de “puestine”, ju sposà une dì a buinorone pre Luigji il Vicjari. E jere proverbiâl la sô premure tai uficis religjôs, savint che i plaseve lâ a oselâ adore.

Cussì che tor lis sîs e mieze i doi nuviçs si cjatarin tal atri de glesie, come une cubie in regule: a jerin om e femine. E larin drets a cjase di Gjeremie, ju spietavin nûf tra fruts e frutis, cinc dai canais a jerin fîs di lui e cuatri di jê. Mi smenteavi di dîus che i doi a jerin restats vedui da poc. E a vevin decidût di meti insiemi chês cuatri besteutis che ziravin tai rispetîfs curtîi, e dâur pari e mari a chei nûf canais, snacaiôs, sporcs e pedoglôs.

Il sorenon “cramars” di Serafine in todesc al vûl dì: marcjadants ambulants. Ducj i oms di cjase sô a vevin fat chel mistîr su pes Gjermaniis. A Gjeremie il sorenon di “puestine” al jere par sô mari. Je no veve mai lavorât in pueste, ma e veve l’abitudin di lâ pes cjasis dal paîs, puartant novitâts e cjacaris maliziosis sui fats di altris.

Gjeremie al faseve il peçotâr. Cun cjar e cjaval al leve pai paîs in cercje di peçots e altris strafaniçs, tornant a cjase sot sere, cjatant la sô cristiane sentade sot de tetoie cirint di dominâ chê mularie, che no le lassave tirâ flât in dut il dì.

No jere mai rivade a pasâur un pietin a chei cjavuts, soredut a lis frutis che vevin lis strecis, e i vevin terôr al pietin.

E ogni altri moment a domandavin di mangjâ, vint simpri fan, someant a chês cuatri gjalinis che passonavin te arie, simpri becuçant alc.

Cuant che ducj si sentavin ae taule, a jerin undis bocjis di sfâmai. Serafine no rivave simpri a meti adun un gustâ cu la cene, e jere scjarse. Une dì Gjeremie, rivânt a cjase, al sintì un berghelarili, i fruts che domandavin di mangjâ. Serafine no veve podût rimedeâ nancje un taîr di polente. Abatude, scanade, e jere sentade tun scjalin, cjalant in cîl e domandave jutori. Gjeremie, viodintle in chel stât, ai dîs cun vôs perentorie:

- Femine, dami il pietin –. Ur bastà ai fruts sintî cheste frase, che a scjamparin a gjambis pal curtîl. Il torment dal pietin al jere piês che patî la fan.

---

la traduzion in spagnûl di chest articul si po leile fracant ca sot : www.leturisencastellano.blogspot.com/2010/11/el-pein.htlm

---

"IL Cjanton di Anute", Letare par Anute

2010-11-02T14:33:00.000-07:00

A son bielzà doi agns che tu tu nus cjarinis, cun lis tôs mans, ingrispadis e strachis, mans par lavâ plats e par scovâ, mans che mai a varessin imagjinât di jentrâ te cibernetiche, vuê a son spauridis, e denant di dute la scjalade tecniche, si sintin vecjis, inutilis te lôr balordisie.

Tastiere -“Nô o savin che la tô etât no da di plui, o valorin i sfuarçs par imparâ, la tô volontât, il to coragjo par frontânus, plui di dut a mi …” -

- “Mancul mal che par cumò tu dopris un dêt sol, viôt tu se fossin ancje chei altris nûf, ce sofrîmint” -.

Surîs - “E jo ce puedio diti? tu as une man tant pesante che ogni volte che la sint vicinâsi…o tremi, o vîf come une cjochele di tant che tu mi strissinis di ca par là, e par tô colpe o ricêf continuis laments de me vicine…la tastiere” -.

- “Mi dîs che tu le masanis a colps, de bande drete a cjamine çuete, magari che podès passâ, di che altre bande, cussì il patiment al sarès pari…” -

Tastiere e Surîs -“ Bon Anute, baste di lamentâsi che no nus puartin a nuie, - nô, Surîs e Tastiere, ti disin che ti amirin e ti volin ben, e che o podedin dital par tancj agns ancjemò” -.

- “Legriti di sei come che tu sês, nô ti fasarìn compagnie, ancje se i tiei dêts a son malpratics, e lis tôs mans grispadis!!

Ti saludin lis tôs amiis: Surîs e Tastiere

---

"Va vilote puartade dal vint"

2010-10-11T07:27:00.000-07:00

     La comedie musicâl “Va vilote puartade dal vint”, scrite dal Mestri Rodolfo Kubik tal 1960 in omaç aes comunitâts furlanis de Americhe, e conte la dolce storie di amôr di Mariute e Tonin, che si urdìs cu la emigrazion transoceaniche.     “La vilote e va pal mont traspuartade dal vint, cun lizerece e une fuarce impetuose e ardint, scuvierzint suns e rivocs, trasformantsi tun preziôs bagai culturâl”. Il merit dal Mestri Kubik al è stât il podè trasmeti tes sôs elaborazions dal cjant popolâr furlan, une forme par sintîsi mancul lontans de amade tiere, unìnsi ad altris furlans emigrâts in Argjentine.     Al è rivât a ricreâ une atmosfere nostalgjiche, mostrant lis soferencis e lis dificoltâts dal emigrâ des personis. Dut chest al da testemoni de filosofie dal Mestri, che vivint in Argjentine, di une bande cence mai smenteâ lis sôs origjinis e par che altre integrât cun la culture locâl, al à contribuît ae difusion de musiche popolâr Argjentine.

     Rigjavât dal articul publicât par “Friuli Nel Mondo” tal mês di Avrîl dal 2010
----
La traduzion in spagnûl di chest articul si po leile fracant ca sot:

http://leturisencastellano.blogspot.com/2010/10/ve-vilota-llevada-por-el-viento.html

"El Cjanton di Anute", Il prin amôr

2010-10-05T13:11:00.000-07:00

Anute la memorie vuê ti scjampe

ma chel ricuart in cûr al è restât

no come fum che al nas e po si sfante

il prin amôr al vîf tal to passât.

Si sa che tu as provât a smenteâlu

e ancje tu âs cambiât altris amôrs

sperant cun ilusion di cancelâlu

di no sinti che spine chel dolôr.

E dopo tante aghe za passade

sot dal to vecjo puint cuasi distrut

tal grant “silenzio”di une gnot stelade

velu li che ti cjale chel biel frut.

Tune slusinte stele al è scuindût

la to imagjinazion lu viodarà

e chel amôr de vuestre zoventût

nancje la muart lu podarà robà.

Chê biele ilusion imagjinarie

e svole vie curiint come il fum

e vuê ti svee la rutine necessarie

par dite Anute al jere dome un sium.

----

“silenzio” cidinôr

---

Pròspar e la valis di carton

2010-09-28T13:18:00.000-07:00

Al jere rivât in chestis tieris te decade dal 30 in cercje di un miôr tenôr di vite. Cuntune man denant e chê altre daur, la drete doprantle par sostignî la mantie de valîs di carton, e la çampe le veve daur de schene, come sburtantsi dantsi coragjo.

La valîs e jere pesantute, oltri a cualchi mude di blancjarie, al veve la cassele dai imprescj. Prospar, di mistîr al faseve il marangon, al saveve manovrâ il len come che fos arzile, al rigjavave des formis unevore singolârs, graciis al snait che al veve tal azionâ i imprescj. Al jere un che saveve un grum sul legnam, ai bastave cjalâ e nulî un toc di len par savè se al jere maleabil o no.

Prospar al fasè onôr al sô non, se ben che al è rivât come che si dîs: tal moment e tal puest just, la sô voie di lavorâ, judade cuntun spêl di sorte, ai de la olse necessarie par rigjavâ profit des miei cundizions de mobilitât sociâl che il puest al ufrive ta chei moments, permetìnti rivâ a sei un imprenditôr di esit tal setôr dal len, rivant a ocupà un puest intune liste “Gotha” democratiche e popolâr.

Ogni tant al lassave la citât par lâ cu la famee tune cjase in campagne. Riceviint di solit des visitis, ju puartave a fa un zîr pe proprietât, al veve une stale cuntun cjaval di raze e tantis besteutis di curtîl, un biel ort che i plaseve lavorâlu, al diseve che lu rilassave dovût al stîl di vite che al veve.

Al finive il zîr menant i ospits tun angul dal parc, li al veve eret une sorte di altarut, sot de lastre di marmul cuntun veri denant, si podevis viodi la stesse valîs di carton rivade cun lui cuarante agns prime, cun dentri la casele dai imprescj che someavin gnûfs apene uçâts.

Braurôs de sôs origjinis, Prospar nol pendolave tal contà ai soi ospits lis vicendis de proprie storie, al pareve di no volè smenteâle.

Cualchidun al dîs che il presint si po spiegâlu cul passât: di sei cussì, la valis di Prospar e je leade ae sô prosperitât.

---

Buenos Aires e la emigrazion

2010-09-07T05:54:00.000-07:00

     Buenos Aires, al è un comprensori grant e slargjât, cun 200 km. cuadrâts di superficie. Lis viis citadinis, a diference des citâts europeanis, a son in rie e scuadradis, un isolât al misure cent metris incrosantsi cu la prossime traviersial, ancje cjaminânt no si po pierdisi, un esempli : se tu sês al numar 0 di une strade, e tu vâs al 1500 de stesse, tu fasis 15 isolâts, cjatant il numar de puarte cirude.

     Cjapin un isolât di cheste metropoli, 100 metris di lungjece, cun 25/30 cjasis intai doi marcjepîts, in plui de metât tu cjatarâs cognons talians e spagnûi.
     Tantis fameis di divignince taliane, a san che i vons a jerin talians, ma no san altri, ven a stâi, se a jerin dal nord o dal sud de penisule. Tai ultins agns si instalà in tancj câs, une preocupazion di ricercje informative, volint savê di plui de proprie assendence direte.
     Tai ultins agns la grande emigrazion tradizionâl dal passât secul e je cuasi cessade, sostituide cuntune gnove di provignince dai convicins, in particolâr Bolivie e Paraguay, ma ancje di paîs asiatics.

     Te decade dal 80 al inizià in Argjentine une corint di espatris, direts viers Europe e i Stâts Unîts di Americhe. Si podarès fevelâ di une “tornade” ai paîs di origjin.
     Purpûr si cjatin ancjemò emigrants talians e furlans rivâts ca daspò de seconde vuere mondiâl, ormai in etât avanzade. Vint la lôr dissendence une gnove modalitât, chê di sei, “Argjentins - Talians”.     La statistiche nus dîs, che Italie e Spagne, a son stadis chês che plui int a àn mandât pal mont. Si calcole che 25 milions di argjentins a àn almancul un antenât talian, issint il plui impuartant grup etnic dal paîs.

     La grant part des associazions cun edificis ancje centenaris, a àn viodût tal timp il sfuarç e la buine volontât di tante int, al dì di vuê si cjatin cuasi bessolis, par no vê chê ativitât che vevin in altris agns, cuant che l’emigrant rivânt al paîs al cirive cun ansie il “Fogolâr”, di riferiment de sô regjon taliane.     Al pararès che il zovin “argjentin- talian”, nol vedi i stes dibisugns dai soi vons, che di sigûr a vevin altris necessitâts.
---

"Il Cjanton di Anute", Siore Vigje di Morsan

2010-08-31T18:28:00.000-07:00

Tal dì des benedizions des cjasis, pre Alberto (fi di siore Vigje) dopo messe al partive cul muini e doi zaguts a benedî lis cjasis.

Siore Vigje e crodeve che la canoniche e fos benedide par prin, issint peade ae glesie, pal fat che e je simpri stade cussì.

Ma no je lade drete, pre Alberto cambiant itinerari al scomençà par Cjastions, dopo trê oris al rivà devant de canoniche.

Si usave che chel dì, il predi al cjatàs viertis lis puartis, viodint la canoniche sierade si metè a berghelâ, - Mame, vierç la puarte -, presentade siore Vigje cun muse lungje ai disè – pre Alberto, tu sês moderni, tu cambiis lis regulis de nestre Mari Glesie.-

Capiint la antifone e riduçant si met a benedî: cusine, tinel, cantine, lis cjamaris, il granâr, po il bearç, il gjalinâr e par ultin il cjôt, fermant di preâ di colp, cjalant so mari i dîs: – Ce viodio, dopli, o sono trê purcituts, jo o ai comprât dome un? -. Siore Vigje rabiade ai rispuint: - no sta pierdi timp, pre Alberto, va a benedî che al è tart, no ai voie di fotis -.

Vigje ducj i agns e tirave su doi purcituts, tignintju scuindûts tune stanziate destinade a imprescj di campagne, che so fi nol meteve mai il nas. Cuant che pre Alberto al leve a fâ i esercizis spirituâi, e clamave il purcitâr e par ordin che saltavin fûr i salams, e jemplave la sporte cun chel ben di Diu, spartintju tra i puars, tornant a cjase strache muarte, contente de buine opare.

Il destin al volè cussì, molât che e veve il purcitut dal cjôt e ancje chei altris doi, cence dasi cont ju sierà ducj insiemi.

Par chest la maravee di pre Alberto, il muini al saveve dute la storie, i a pandût al plevan dulà che levin a finî lis luianiis dai doi intrûs.

Pre Alberto, cul cûr sglonf di amôr par chê mari tant gjenerose, al tornà a cjase legri, content come se nol fos pasât nuie, siore Vigje i veve dade une grande lezion, ancje se analfabete.

E za nol tocjà l’argoment cun sô mari, ma ogni stagjon al comprave trê purcituts par continuà l’esempli e la lezion, che ai veve dât siore Vigje.

---

I Cosacs in Friûl

2010-08-10T13:24:00.000-07:00

None Marie e veve une ostarie clamade “La Sperance”.

    Une dî si presentin trê cosacs vistuts cun dai grancj capotons, tal cjâf il colbac e grandis mostacjs.
     I cosacs, une minorance russe origjinarie dal Kazakistan. la tiere dai grancj flums, si identificavin pai bregons, chei che a vevin une rie rosse al vignive dal Don, se e jere zale dal Terek.     In Friûl a rivin tal 1944, si calcole cirche 50.000 personis formant fameis, si son puartàs daûr 6000 cjavai e 50 camêi.
     A àn ocupât dai paîs e des borgadis cjargnelis, lant sparniçantsi tes valadis, rivant fin ae planure, si son fermâts ancje a Tresesin.

Parcè cheste invasion? I todescs a ur vevin prometût la Cjargne, a cambi che judassin a combati i partigjans locâi. I Cosacs civîi a rivarin cu lis caretis e cjars tirâts dai camêi e cjavai. Mai in vite mê o vevi viodût cjavai tancj grancj e fuarts. Si ju viodeve une vore brâfs tal lâ a cjaval, o soi sigûr che tignivin da cont plui la bestie che la proprie persone, strighiantle e lavavantle, e lôr a someavin pluitost abandonâts. Si riunivin in circul ator dal fûc, cusinant dai piçui animâi, une volte cuets sal passavin un a di chel’altri, lu stes che cul bevi, une sene une vore primitive.

E tornant ai Cosacs te ostarie, al è di dì che: mancul mal che mio pari al saveve il todesc e al jere presint, cemût che al à podût, al capì che volevin comprâ une damigjane di vin, patuît il presi ur dîs par todesc: - “Gut eins stunde”-. Volentju diur che al varès vut di preparâ la damigjane, che a tornassin tra un’ore.

Al è lât cu la none in cantine, e intune damigjane di 50 litris al à svuedât un seglot di aghe, me none cjalânt il sofit e fasîntsi variis segnâi de Crôs ai dîsè: -Joisus Valerio , se si dan cont nus copìn -

Cheste int no a vût un finâl seont il prometût, cu la colade dal Tierç Reich ancje lôr a àn vude la piês, di diferentis formis. Une violence inutil, come che a son dutis lis vueris.

---

La traduzion in spagnûl di chest articul si po leilu fracant in:

http://www.leturisencastellano.blogspot.com

----

"Il Cjanton di Anute", La misure dal salam

2010-08-03T13:12:00.001-07:00

Ce fiestone par nô fruts. Apene che o sintivin rumôrs in cjase o saltavin fûr dal jet. In chê dì si purcitave, mi sarès tocjât a mi chest an tignî la code. E jere une tradizion che no mi plaseve masse, si doveve fâlu par usâsi a dut. (cussì a disevin i vecjos).

In cusine si sintive un davoi di pignatis, al jere dut un businôr spietant il purcitâr. Lis feminis preparant la cjalderie di aghe bulint e i oms un breâr par pogni chel puar condanât.

Cuant che Mario al rivave si començave la vore, gno pari e Zuan Sibin lu tignivin pes gjambis. Me mari intun cjaldîr e cjapave il sanc, puar animâl si sintivin i laments par dut il paîs. Cuntune man (malvulintîr) i tignivi la code, e cun chê altre mi taponavi la orele sane, di chê altre o jeri sorde di nassite.

Prin lu scuartavin, podopo e separavin la cjar masanantle seont il sô destin, al jere cussì biel viodi saltâ fûr dutis chês luianiis tarondis, i salams, i musets, la palmone e cul sanc che al restave a fasevin la “mule” cu la ue passe, che a nô fruts nus plaseve tant.

A Bunzic e jere la usance che il frut che ai tocjave tignî la code al veve di là a domandâ la misure dal salam in cjase di parincj o amiis. Mario e gno pari (birbants) si meterin dacuardi di mandâmi a domandai la misure dal salam nie mancul che al barbe predi.

O vevi vôt agns e jo cence malizie mi presenti in canoniche, disiint a Pre Josef il motîf de mê presince. No ricuardi ce tant che al à murmugnât deventânt ros in muse come un cjapon, mi a compagnade fin fûr de puarte, jo o crodevi che al si fos smenteât, o torni sul argoment e i dîs:

– Siôr barbe, che mi disi la misure dal salam -.

Mi cjalà a dilunc e di stuart, disintmi – Va a dîsi a chei doi pecjadôrs che ju spieti usgnot in glesie tal confessionari, lì ur darai di pinitince la misure dal salam.

---

Agnul il garzon di buteghe

2010-07-21T10:30:00.000-07:00

Agnul al jere garzon di buteghe cuntun barbe. E ancje zago te glesie dal paîs.
Une dì di setemane a buinore, al viodè al muini jentrâ in buteghe, ai nulive simpri intor un odôr a cjandelis studadis a man.

Come che nol jere client al pensà: - ce volaraial cumò?, - difat il muini al disè: - Agnul, bisugne che tu vegnis cun me “ipso facto”, al è di celebrâ un matrimoni e no vin cjatât nissun altri, - No lu lassà che al disedi lis sôs, cussì che Agnul ai domandà permès al paron che al dîs di si, par no dì di no.

Agnul si gjavà la gabane grise disint al muini: - lassimi lâ a cjase par cambiâmi, - nuie di fâ, bielzà lis cjampanis a dindonavin a messe di gnocis. Plui di cualchi vecjute no si sarès pierdude une ocasion come cheste, cjapâ messe e viodi i nuviçs. Tai matrimonis e tai funerâi simpri a tiravin dongje int, par curiositât o par altri.

Rivâts in sagristie juste cul timp di vistisi e di metisi la tonie, il celebrant al jere bielzà pront, e i disè – su, su svelt che al è tart - , al someave cundut rispiet un cjaval di bataie che al mastiave il smuars, si viodeve che al veve premure, a jessin pe puarte de sagristie, e come une bugade di aiar si cjatin denant dal altâr.

E chi al scomence il sô calvari. Agnul, al jere cjalzat cuntun par di çuculis, cence suele di gome, podêso imagjinâsi che a ogni pâs al jere dut un toc, toc, al cirive di alçâ i piis plui che al podeve, cul stes risultât, toc, toc, nol podeve svolâ, al cjaminave in cjamare lente lant su e ju pe scjalinade dal altâr, sal fos colât il messâl al sarès lat a finîle jenfri i piis dai nuviçs.

Il predi ai butave ogni tant cualchi olmade di traviers, finalmentri al rive il tant sperât -“Ite missa est”-. Rispuindìnti - “a Deo gratias”- nol veve mai sudât tant in vite sô.
Al à viodût che il copari dal anel al leve viers di lui, e metìnt cualchi franc in man, ai de une pache su la spale, disint – Brâf, brâf –

Il suplizi al jere finît.

---

Checo e Taresie

2010-07-14T08:45:00.001-07:00

Chèco e Taresie a vivevin tune cjase contadine, za no lavoravin i cjamps. Il vistiari al judave a viodiju plui vecjos. Chèco, cul toscan in bocje, a voltis impiât fumantlu, o distudât cicantlu.

Taresie, un façoleton neri sul cjâf e un sialet su lis spalis. Lôr a levin te ostarie de “Sperance”, Chèco bevint varis taiuts e Taresie, cirint di evitâ che nol bevès, lu compagnave cun plasè. A tornavin a cjase legris, Taresie pierdint il sialet par strade.

Ce che no pierdeve e jere la pipe, strenzintle fuart tra lis zenziis sdenteadis..

Di vicins a vevin Marie cu la sô famee. Lis cjasis a jerin elevadis dal nivel de strade, par rivâ a lôr a vevin la stesse stradele di claps in rive su, che puartave tal clamât “borgat”. Lis feminis e jerin amiis, Taresie e jere la plui vecje, al pont che e podeve sei sô mari: feminis di etâts diferentis a puedin rivâ a bogns rapuarts, come mari e fie.

Il fi di Marie, Beput, si lu viodeve simpri maladiç, il miedi ai veve dit: fieris dai reumatisims. Ai àn cjatât un lavorut di comès tune marçarie.

La mari dal paron, siore Mìlie, e jere femine di pocjis peraulis. Si mormorave che fos strie. Si diseve che no veve bestiis par cjase, suspietant che lis ves copadis tun rît satanic.

Taresie i metè tal cjâf a Marie, che Bèput al jere “striât” des fuartis cjaladis de Siore. Dovevin fâ un sconzûr par disgropâ il malefici. Taresie, savint des formulis, e varès metût man ae vore.

Une dì lis dôs feminis, puartant cualchi capo di vistiari dal frut, si son cjatadis ator di une piere dongje cjase, metûts i vistiduts sore, ce àno fat ? Cuant che l’orloi de glesie al de la miezegnot, a scomençarin a pestà cun fuarce, sacraboltânt cuintri la siore Milie, che a ritignivin colpevul. La pestefole e durà pocs minuts. Tornant a cjase, Taresie i disè a Marie, che doman la prime persone che varès cjatade e sarès stade siore Mílie rabiade.

Infat, Marie jentrant in paîs le viodè par prin, malementri di muse. Al jere palês che veve passât une brute gnotade.

---

Lis gnocis di Gjise e Tine

2010-06-15T07:42:00.000-07:00

E jere une domenie dal mes di Mai.

Dopo messe, si viodè jentrâ tal curtîl di Checo Lusigne, nie mancul che il Siôr Plevan, une sorprese par ducj, mancul che pes fiis di Checo.

Riverît, soredut dai fruts, cuntun – Sia lodato Gjesu Cristo- al rispuindè automatichementri - Sempre sia lodato - Lu comodarin tal tinel, sentantsi ancje i nonos, i paris e lis dôs fiis, il rest de famee si poste tal curtîl, spiçant lis orelis, no volevin pierdi gote di peraule.

Il Plevan, al saveve cemût zirâ la fertaie par no brusâle, si mande a discori dal parcè de visite, cuntune locuzion che someave vanzeli, al laudave a doi oms, un al jere dal paîs, al viveve tai cjasâi passant la Sfueime, al veve cjamps, bestiis te stale e trê canais par cjase.

L’altri al jere un furlan stabilît tun paisut dongje Parigji, in France, al lavorave tune feriere, al veve dai fiis, e ca il Plevan ai deti impuartance al fat che in cjase si fevelave dome furlan.

- Ah…benon – e dîs la none (pensant in alc positîf).

Gjise e Tine no alçavin i voi de taule, a dovevin savè alc, a jerin saldo in glesie !!. Al pareve che vessin cumbinât cul siôr plevan, che, finide la sô filipiche, une des miôr predicjis dai ultins timps, al zontà :

- Chei doi cristians a restarin vedui, - e cence tirâ flât, viodint che la mari e stave par fevelâ, come prionte al dîs :

- E sarès une opare di ben, viers chestis personis e lis lôr fameis, e oltri dut une sistemazion par chestis dôs zovinis. Che a vegnin a cjatâsi par volontât dal Signôr e de sô tant venerade mari, cuntune famee che ur darà contenzion e protezion.

I àn ufiert un cafè di vuardi cuntun bicjerin di sgnape, cjacarant dal plui e dal mancul su lis ativitâts de parochie.

La sielte di “cui par cui” le fasè il plevan, cognossint a lis dôs zovinis. Tine, la plui minudine, le mandà in France. Gjise e restà in paîs, za che e jere dispueste a lavorâ la campagne.

Lis dôs sûrs si son sposadis e sistemadis.Il Siôr Plevan al è restât une vore content di vê fât une opare di caritât.

---

La podine di gnagne Nene

2010-06-09T11:52:00.000-07:00

Ducj in cjase le clamavin gnagne Nene, e jere la maiôr di une schirie di fîs, dopo di je, an’derin vignûts altris nûf e ducj mascjos , tal jenfri a jerin nassudis un par di cubiis zimulutis, il Signôr lis à voludis subit cun se, cussì e diseve la mari.

O podarês dasi cont che Nene intune famee cuasi dome di oms, e scugnì scomençâ di piçule a movi il poleâr, no i fasè mai pôre il lavôr, rassegnantsi a no partecipâ a zucs e trucs che fasevin lis amiutis tal curtîl e che je e viodeve pal barcon.

La ruede dal timp e le fasint il sô lavôr come un fin intarsi, i fîs a lerin sposantsi e cjapant il lôr puest te cjase dai paris, che paraltri e jere une vore grande. Ancje se cumò gnagne Nene e veve l’aiut des cugnadis, lu stes e jere simpri in prime file tratantsi di lavôrs.

Nene si sintive un poc la mari di ducj chei fruts, la sabide tor sere si cjapà l’impegn di fâur il bagn setemanâl a dute che canaiade. Che an daur an e leve in aument.

Tal ronc daspò des stalis e jere la lissiarie, la stanzie dulà che si lavave dut il sporc, si scjaldave la aghe cun fûc a lens. E la sabide tor sere, une podinone e scomençave a ricevi il prin frut, si leve dal plui piçul in su, ad ogni un che al passave ai zontave un seglot di aghe, cuant che e rivave ai plui granduts, la gnagne Nene ai lavave dome la schene, podopo si ocupave di altris voris, intant che il frut al finive di lavâsi bessôl.

Jo o jeri simpri l’ultin de file. O lavoravi fin tart. Po o traviersavi il curtîl e il ronc plen di pôre pal scûr, o rivavi ae lissiarie cjatantle simpri riscjaldade dal fûc ancjemò impiât, dantmi ancje il lusio di cambiâ l’aghe de podine che bielzà e jere di un colorut maron.

In chei timps in cuasi dutis lis cjasis a vevin une gnagne Nene. Vuê, lis gnovis fameis no àn bisugne di lôr. E par chest che bielzà no si lis viôt zirant, traficant e businant intorsi dai fruts.

---

"Il Cjanton di Anute", Il grim

2010-06-02T05:01:00.000-07:00

Cui no si ricuardial dal grim de none ?

Chei de mê etât, a san ce che o dîs, ancje lôr lu àn gjoldût come me…

Jo o vignivi fûr di scuele tai dopomisdì di invier, un frêt di murì, la none e jere te stale a scjaldâsi cul flât des vacjis, sentade sore une bale di stranc, gugjant maiis e cjalcis par dute la famee.

Cualchi volte e filave cul fûs, fasint vignî chê glagn di lane cussì fine che someave comprade, cun chês manutis secjis e strussiadis a fuarce di lâ a fâ lens e baraçs tal bosc.

Alore po, apene che o tornavi di scuele, o corevi drete te stale, là che la none mi spietave cul so grim cjaldut come une stue, jo o jeri simpri ingrisignide se ben che o vevi la maie e cjalcis di lane e i çupiei di len che ju faseve il “pai”, però la none cu lis sôs cotulonis penzis e grandis mi faseve une cove tal so grim, e jo o saltavi dentri, mi pareve di sei un poleçut sot de clocje.

Vêso capide la storie dal grim ?

Cumò lis nonis a usin bregons, i frutins si scjaldin cu la stue, e jo che îr sere o soi insumiade cu la none, o ai sintût i piis in bore come che o fos tal so grim.

Us salude. Anute Leonarduzzi

---

25 di Mai 1810 - 2010 Bicentenari Argjentin

2010-05-25T05:14:00.000-07:00

Vuê o unìn concetualmentri une fieste e une frase: la fieste pal inovâl numar 200 de rivoluzion dal 25 di Mai dal 1810 e une frase unevore cognossude che dîs: “I Argjentins a dissendin des nafs”.

Ducj o savin che, in realtât, chei che a son sbarcjâts des nafs in chest lontan e austrâl puart di Buenos Aires, a son stâts i milions di emigrants che rivant di tieris lontanis, a àn contribuît cul lôr lavôr e sfuarçs ae costruzion di cheste nazion.

La emigrazion taliane e je stade une des plui numerosis rivadis a la Argjentine e fra lôr i furlans. Il larc viaç a traviers l’atlantic al durave plui o mancul un mês e par tancj il puart di partence e jere Gjenue cun destin finâl Buenos Aires, fasint des fermadis intermediis.

In Argjentine tancj a àn fondât coloniis impuartantis tal interni dal paîs; za che in chei agns il teritori Argjentin al jere scuasi spopolât e si veve bisugne di man d’opare par lavorà lis imensis estensions di tieris. Altris si son fermâts tai centris urbans.

I furlans in Argjentine a mantignirin lis lôr usancis e costums, conservant vîf il ricuart dal lôr paîs.

A son tantis lis personalitâts di origjin furlan e dissendents che si son distacats pes lôr ativitâts in diviers ambits de vite nazionâl, te politiche, te religjon, tes arts plastichis, te musiche, tai sports e la culture.

I interessats a cognossi tai detais i nons di chescj protagoniscj a puedin ricori al libri “Los Friulanos”, editât de Associazion Dante Alighieri di Bs. As, scrit dal Dotôr Eno Mattiussi, un furlan nassût a Pantianins, in provincie di Udin, emigrât in Argjentine tal an 1947 e che al è stât President dal ex Centri di Culture Argjentin Furlan.

Come furlans di origjin e come Argjentins dissendents di furlans, il nestri salût ae Republiche Argjentine

---

Jacum dai zeis...

2010-05-19T08:46:00.000-07:00

Giacomo Bonutti, clamât “Jacum dai zeis”, al faseve il marcjadant ambulant, al jere nassût a Paradîs di Pucinie tal 1855, e al viveve a Talmassons.

Al vignive clamât il “Re dai marcjâts”, al è deventât famôs pai soi scherçs, pe sô origjinalitât e improvisazions.

Lis contis di Jacum dai zeis a son cognossudis dapardut il Friûl, tant di meretâsi insiemi al mussut un monument, tal comun di Codroip.

Us contarai une piçule conte, che à fat il zîr dal Friûl, come dutis lis sôs storiis .

A mi me àn contade cussì......

Une dì Jacum biel lant a cjase sô, cul cjar cjamât di marcjanzie, al viôt che la perpetue dal plevan dal so paîs, e meteve a suiâ des cjamesis, volìnti fâi un scherç al predi, di scuindon al cjape su une e se puarte a cjase.

Tal doman si met su cheste cjamese, cumbinazion che al passâ denant de canoniche si cjate tu a tu cul plevan, chest, che nol saveve il fat, i dîs:

- bundì… Jacum, cemût vadie? -,

- eh..siôr plevan, (e passantsi la man tor il golet de cjamese) i rispuint:

- un tic comudute di cuel –

- ma va la, tu simpri tu âs lis tôs - i disè il predi,

- eh no “Lustrissim” cheste volte e je des sôs - !!

O varès capît che l’umôr di Jacum al jere sclet, ma che al saveve fâ ridi cu la sô grande umanitât.

Mandi.

---

"Il Cjanton di Galliano" il barbe Sêf, la purghe

2010-05-11T18:40:00.000-07:00

Il barbe Sêf al jere un furlan di altris timps. Pocjis voltis si jere mot dal paisut natâl, si po contâlis tune man, la ultime volte al è stât cuant che lu àn puartât d’urgjence tal ospedâl.

Savêso parcè ? al veve di lâ a gnocis de fie di un copari, e sarès stade une fiestone, al varès fat une mangjonade, une sbultricade, che di sigûr si sarès fevelât dilunc in paîs.

Si che duncje, un par di dîs prin, al le in speziarie, ducj lu cognossevin, e no par sei un client.
- Alore Sêf – i disè il speziâr,
- Dotôr, o varès bisugne di une purghe par liberâ il stomi, cumò che ven la primevere – Il speziâr i deti une butiliute e lu racomandâ di cjolisi un gucjarin prin di lâ a durmì, e no di plui, issint chest un purgant une vore efetîf.
- Si, si – ai dîs Sêf, che nol si preocupi lui.

Rivât a cjase, e rispietânt al speziâr come che i veve dit, al puartà la butilie ae bocje par dai un cluc, e cui sa ce che i passà pal cjâf, che alçânt il comedon le fâs fûr dute, passantsi la manie de cjamese, par netâsi i lavris e i mostaçs, po si met tal jet sperant di durmî, e che tal doman al varès vut l’efiet desiderât.

Vie pe gnot si svee cuntun malstâ gjenerâl, voie di butâ fûr, inzirli e tante pôre, che fos rivade l’ore di lâ a fai compagnie a Melie, la sô femine, (requiem).

Come che al po si met a clamâ al nevôt, che viodint la butiliute vueide e il stât dal barbe, al tache il cjaval al saret, al buluce l’om tune cuvierte, e movint la scorie su la schene dal puieri, a rivin te sale dal pront socors, al ven ricoverât d’urgjence. Il nevôt al â passât la gnot tune bancje de sale d’aspiet.

Tal doman al ven informât che Sêf si jere salvât par un pêl, al veve une apendicite, che graciis al purgant i veve acelerât e sveltît tune buine peritonite, operât durant la gnot, se le varès puartade fûr.

Cheste aventure e à vût il so presi, nol â podût assisti aes tant desideradis gnocis, e al bacanâl gastronomic.

---

"il cjanton di Anute" I dincj di lat

2010-05-05T05:58:00.000-07:00

     La cjase e jere grande e antighe in chel paisut solitari, lontan des citâts modernis. Lis parets di gruessis pieris discompagnis, tacadis tra di lôr cun savalon e pantan, tal jenfri si viodeve cualchi frissure che la misturance no jere rivade a stropâ.
     I vecjos a cirivin di trasmeti ai fruts i us e costums ereditâts dai lôr viei. La frute in etât precoç e veve imparât, che ogni volte che i colave un dint di lat e veve di platâlu jenfri chês pieris, cussì cuant che di vecje e murive ju varès puartàs cun je.
     Il barcon dal dormitori al jere une vore grant, cjalant fûr e viodeve un cîl celestin e lâju lontan lis montagnis sblancjadis di nef, ma purtrop no i bastave.

     Il so sium al jere di vê une cjase come chês viodudis in citât, cuant che e leve a fâ spesis cun sô mari. Al cjalâlis tant bielis, ben pituradis e i mûrs drets, e leve in gaudie.
Une dì, bielzà cressude, la fantate e lassà il paisut, lant a vivi tune citât cu lis cjasis gnovis e pituradis, ma la sô cjamarute e jere tant piçule che al jentrâ e sintì frêt, chês parets ai davin sbisie, malcuietece, si sintive come presonire.
     E vierzè il barcon cjatantsi denant di une grant cjasament che al paronave la citât, si spaurì no viodint chel cîl celestin che viodeve te sô cjase lontane, sintint un dolôr profont par vele bandonade. Di colp, daurman i jentrà une voie di tornâ ae sô cjase di pieris discompagnis dulà che a jerin platats i soi piçui dincj di lat.

---
Cheste conte, premiade l’an passât de "Upam" tal cors di leterature de Universitât par majôrs, le à scrite Anute Leonarduzzi, di Rosari Santa Fé, Argjentine.

---

Menie e Luzie 2ºde part

2010-04-28T06:36:00.000-07:00

Jo, dutis lis domeniis dopo messe, o colaboravi cu la parochie, insiemi cun altris fruts, pe distribuzion dal setemanâl “La Vite Catoliche”.

Gno fradi metintsi i bregon luncs, mi veve passât i soi “clients”, tra lôr o vevi ancje Menie e Luzie, cussì o ai vût mût di jentrâ in chê uniche stanzie di un secont plan, fasint un pâr di rampis di scjalis e doi coridôrs dulà che i vecjos trâfs a scriculâvin, ma a tignivin dûr.

Cui miei pocs agns, o podei viodi in muse une miserie di fâti pôre, ma par chê zornade a jerin rivadis a meti di bande, chês cuatri palanchis par comprâsi il setemanâl.

O soi rivât a viodi ancje il ledrôs de medaie, i puartavi il gjornâl ancje a une siorete, che dal prin plan de sô vile, mi mandave ju un zeut tacât cuntune cuarde cui bêçs dentri, al jere par evitâ lis scjalis, dôs situazion, come il dì e la gnot. E par finì cheste conte, us disarai, che lis dôs sûrs a lavin pai negozis e ostariis dal paîs a domandâ.

In ducj i paisuts che tu levis si viodevin des tabelis, tacadis tai mûrs des cjasis, che a disevin: “in chest paîs, al è proibît pitocâ”. Leçs che nissun al rispietave devant de miserie e di solit ur davin alc,

Luzie e jere pluitost timidone, in cambi Menie e jere une femine risolude.

Mi ricuardi che le viodevi te ostarie di Marie Sperance domandant se i davin mieze taçute di vin, le paiave cuntune biele cjantade, za le cognossevin che podevin fâle contente cun tant pôc, dopo vele bevuçâde e intonave cuntune vosute magre e piçule come la sô persone:

“A no ‘nd è mai stade ploie / che il bon timp nol sei tornât ”.

Dit in altris peraulis: Simpri che al à plot, al è tornât il soreli.

---

Menie e Luzie. 1ºme part

2010-04-21T06:07:00.000-07:00

Il so non al jere Domenie, ma ducj in paîs le clamavin Menie, e jere une femenute magre come une canocje di sorc, no plui alte di une scove metude in pins, la sô etât, ce podaressio dî, tai miei ricuarts le ai simpri viodude come che fos une none di altris timps, biel tornânt indaûr cul pinsîr, no come lis nonis di vuê, par capîsi.

E viveve cun sô sûr Luzie, ( a someavin zimulis) tune stanziute di un secont plan, intune cjase che e jere proprietât dal Comun.

E come dutis chês altris fameis che a vivevin tal stes stabil no paiave il fit, par sei anagrafichementri misaris, o pues sigurâus che comoditâts a no’nd jerin ni pocjis ni tropis, fasint une liste di prioritâts minimis, il gabinet o

necessari, seont che o volès clamâlu, si lu cjatave tal ronc daûr cjase tun gabiot, cuntune buse tal mieç e cuntune puarte che faseve pietât.

Imagjinaitsi ta chês zornadis di criùre, jentrâ ta chel gabiot, l’aghe a vevin di tirâle su dal poç che al jere tal mieç dal curtîl, ce che e veve di positîf cheste aghe che in istât e jere buine e frescje.

Volint slungjâsi in altris detais dai altris bisugns, baste pensai sù un moment, la cjase in cuistion si le clamave “Il Ricovar”.

Dôs peraulis ancje par dî cemût che si vistive cheste tribulade femine. Il so vistiari principâl al jere une cuvierte che le usave a mo di cotule lungje, taponantsi par ben de vite in ju fintremai ai pits, par che no i colàs, le sierave cuntun biel pontepet, e de vite in su e veve simpri cualchi gjachete, ancje di cualchi numar plui grande .

Dispès si le sintive che a diseve une frase afermative: “Mile, e non piu mile, in chê buse o vin di finîle”. Une frase sibiline che e someave un fulmin di oracul. Seont Menie, la umanitât no sarès lade oltri il vincjesim secul…

---

Gnove vieste di "Leturis"...

2010-04-15T11:09:00.000-07:00

“Leturis” al cambie di vistît e si met la golarine, o vin dât une man di blanc, cambiât il dissen de pagjine, modificât la disposizion e il colôr.

Val a dî che la cjase e je la stesse, o vin dome cambiât di sît i mobii.

Il prin miercus dal mês o larin indenant cul “Cjanton di Anute”, zentilmentri scrit come simpri de Siore Anna Leonarduzzi di Rosari, Santa Fé, Argjentine.

Tes restantis publicazions dal mês a laran lis storiis dal “Cjanton di Galliano”, che si puedin scoltâ par Radio Magna (www.am680.com.ar) lis sabidis a lis 11 di buinore, ore di Bs.As, vent cussì la pussibilitât di scoltà e lei la stesse storie.

O speri che il cambi us plasi, us saludi cuntun mandi nostran.

ººº

Il Cjanton di Anute, "Monolic"

2010-04-07T05:33:00.001-07:00

O ai decidût cambiâ vele te me vite, mi sint che o soi restade indâur rispiet a la vite moderne.

Soredut i miei fîs ultimementri mi disin di atualizâmi, di metimi in zornade, - nol po sei, no tu ses tant vecje - !! Benon!! Al è decidût. Cumò o ai un “personâl trainer”, mi compagne dapardut, cun lui o ai capît un grum di robis che prin no savevi.

O ai imparât a fâ us dal cassîr automatic, lâ su e ju pes scjalis mecanichis tai “Shoppings” cence problemis, prin mi si ingrampavin i tacs jenfri i scjalins, a disbratâ pratichis bancjariis ecc…ma simpri cul mio “trainer” vicin, lin al teatri, al cine, spetacul gnûf che si presente, li nus cjatais di sigûr.
Cumò mi sint un’altre , il cuarp plui agjil e snel, cu lis dietis o ai parât ju 20 chilos, o dimostri 20 agns di mancul, cosmetics e cremis par tignî la piel elastiche, mi cjali tal spieli e no mi ricognòs, e ca, o scomenci a vê dai problemis…ai miei fîs no ur plâs il cambio.

Mi àn cridat pal cambiament, a mi disin ¿mame, ce ti sucedial?. Jo no ju capis!! Prin a mi disevin antighe, vuê che o soi ben moderne e dispatussade no ur plâs, cui ju intint !!!

O ai decidût di no fâur câs, cussì mi sint ben, mi sint zovine e par ce no…desiderade!!

No stoi pensant tune cubie, no par l'amôr di Diu. Il gno puar vecjo al po polsâ in pas, o stoi ben cussì. Cul mio “personâl trainer” a mi baste e a mi vanze.

---

Il paradoss di chest câs al è che i fîs a volevin une mari indipendente, cussì a varessin plui libertât. Cumò ur da fastidi chê indipendence par considerale improprie

---

Int cun me

2010-03-30T14:48:00.000-07:00

Siore Martine e viveve parsore di une culinute, tune cjasute separade da une paradane: di une bande jê e di chê altre la cjavre. Tal Invier a vivevin insiemi.

Agns indaûr, Martine e veve une vacje. E ancje dai fîs, che cumò a jerin lats colocantsi tal mont, come miôr prodot di esportazion, jo stesse mi confondevi, Bòston - che je a diseve, "Baston".

Une o dôs voltis ta l'an e riceveve letaris. E stavin ben. No mandavin beçs parcè che si jerin sposats, o tornats a sposà, o al jere nassût cualchi frut.

Al jere logjic, i fîs a fasin fîs.

Ma da l'Argjentine mai nissune notizie. Par chel jê mi insisteve:
- Mê fie e vîf in Argjentine come to mari!! Par ce no i scrivistu che ciri a Mafalde?.
- Argjentine e je grande, plui grande che Europe, o esagjeri par dai sot al mio aviliment.

Martine e menave il cjâf, si sentave, suntun scagn di len e vencs, che al servive par molzi la cjavrute. E cjalave lis stradis di montagne, che si vierzevin come une vintuline, par ogni une di chês viis a jerin partîts un a la volte i fî.

Jo o spietavi savint che mi varès regalât une scudiele di lat, intime e clipe.

E intant che molzeve e lave ripetint cu la gravitât di un che al conte un sucedût.

- A disin che in Americhe, un mostro al mangje il cûr dai fîs, si fasin siôrs, e a àn fintremai i gabinets dentri cjase, i lôr fîs a deventin dotôrs.

- Però a scugnin lassai il sanc al mostro -. E jere ignorante la vecje Martine. Al sarès stât impussibil disberdeâ lis sôs ideis.

E fevelave plui cu la cjavre, che cun la int. E no crôt che cun me e fevelàs diferent. O cu lis cuatri gjalinis, che ziravin li ator ai salts. Gjalinis che vevin di rangjâsi di bessolis, cul mangjâ e dut il rest. Gjalinis, tant magris, e cuntun cuel tant lunc, che no si saveve se levin come matis, par mancjance di gjaii, o par vê cuintri di lôr, une memorie cree e dispreseative.
----------------
Traduzion libare dal spagnûl, dal cjapitul prin pagjine 14 de novele “Gente conmigo”,

de scritore furlane Sirya Poletti.

---

Il Cjalcjut...

2010-03-23T17:30:00.000-07:00

Di piçul o ai sintût spes e vulintîr a fevelâ di cjalcjuts e altris spirts folets, che a vignivin nomenâts cun tancj altris nons, seont cui che ti contave la conte.

Il cjalcjut si po descrivilu come une opression che ti cjape tal sium, a

disevin che al jere un striament.

Tes lungjis seradis d’Invier, cuant che il scûr al rivave adore, a spesseavin a dai di cene ai fruts, i plui piçui a jerin i candidâts par lâ a durmî subit, i plui granduts a levin a discartossâ blave e a specolâ.

Simpri cualchi vecje e scomençave a contâ, e cjale il câs o al principi o finâl de serade, la conte e lave sul cjalcjut, di sigûr la anziane che e contave, cui sa cetantis voltis che lis varâ sintudis dai vons contadôrs di flabis o falopis, l’impuartant al jere il ton de vôs, e la sigurece tal dî, si siguravin un auditori atent e sensibil a cheste tematiche.

I plui zovins a jerin i candidats a ricevi il messaç, che nus sugjerive une misteriose cunvigne cul scognossût, tune misture di pôre, ma al stes timp une aventure che o varessin frontât prin o dopo.

Jo o durmivi tal stes jet cuntun fradi, un da cjâf e un da pît, cuant che me none nus studave la lus de cjamare sierant la puarte nus racomandave,

- durmît subit che se no al ven il cjalcjut -. Jo o levi ben sot lis cuviertis, lis orelis spiçadis pe pôre, come par sintî miôr cualsisei rumôr, e spietânt che si poiàs sul mio pet e al tacàs a pesâmi sore, scjafoiantmi.

Us domandi: vuê, di ce si spaventino i fruts?

---

Stampis di Buenos Aires, il "Bandoneón"

2010-03-16T17:46:00.000-07:00

Il Cjanton di Anute, "Il barcon"

2010-03-02T12:26:00.000-08:00

E jere une biele sere di primevere.

I rifletôrs dal vicin campament militâr, le fasevin ancjemò plui luminose…

Tal cuiet de gnot si sintive cjantâ un gri.

Cui miei tenars sedis agns o spieti che al rivi, e come dutis lis seris poiade sul gno confident barcon.

Lui al vignarà, lu viodarai rivâ di lontan, cul so incidi elegant, snel te figure, o sai che nol ven par me, al ven pe so musiche, mio barbe al è il so mestri.

Avuâl o jeri in glorie…cidine, cidine o varès gjoldût sintint a chês puaris melodiis che al sunave, che par me e jerin la musiche plui maraveose. I vierzarai la puarte riceviint come simpri un soredint e rispietôs amicâl salût, o sintivi sunà lis cjampanis tal mio cûr che al bateve.

Al è un maraveôs sium, ma usgnot la realtât e je un’altre, i minûts a van passant someant secui, e a planc lis cjampanis si van trasformânt in dolorôs suns. Lui nol rive, oh mio Diu no sta scurî cheste gnot tant luminose.

Ce isal passât ? ce lu varaial tratignût ? forsit un trasferiment o magari un amôr ? La spiete e je lungje, i minuts a somein secui, e lis mês domandis cence rispueste.

Dal campament militâr mi rive il sun de trombe dal cidinôr, par me si je fate gnot, dut al è finît. O sint une lagrime mare sbrissantmi clipe ju pe muse avilide, poiantsi sul marmul frêt dal mio cjar barcon.

---

Il zuc de more.

2010-02-09T16:37:00.000-08:00

L'origjin dal zuc de more al rimonte ae antighe Rome.

Si clamave “Micatio o digitis micare”, il verp “mico” in latin al significhe: fulmin, lamp, riferintsi ae velocitât dai moviments dai dêts. Al jere cussì difondût che, par definî un om onest, si usave dì “e je une persone cu la cuâl, si podarès zuiâ di more a scûr”.

I doi zuiadôrs a sbassin il pugn diestri al stes timp, distindint rapidementri un o plui dêts, disint o miôr dit berghelant un numar tra il 2 e il 10…Se il numar indicât al corispuint ae sume dai dêts distirâts, (il pugn sierât al val 1), si segne un pont a favôr di cui che al à induvinât.

Se la sume e je induvinade dai doi, il colp nol è valit.

La more si le po considerâ un zuc d’azart, proibide tai agns dal fassisim, considerade come cause discjadenant di cuistions e barufis, cheste leç e je ancjemò in vigôr tai ambients publics.

A son variis lis associazions in Friûl che si preocupin di recuperâ il zuc de more come tradizion popolâr.

La more si zuie cu la man e la vôs. La maleabilitât des stessis a permetin, ai zuiadôrs plui scaltris variâ estri.

D’altre part e esist la pussibilitât che si po imprestâ magnifichementri a des piçulis furbetâts. Cheste art si podarês definî in dôs categoriis:

Lecitis: muts par meti in dificoltât l’aversari.

Ilecitis: une vere e proprie robarie.

Il probleme de more, e la fortune di chest inzen, che il limit tra lis dôs situazions, a son ben definidis da lis regulis, ma che son di dificil percezion, se o considerin la rapiditât dal zuc.

---

Podin comparâ la “more” al “truco”, un zuc di cjartis unevore popolâr in Argjentine, ancje in chest câs si dopre tant i mots e i segnâi par ingjanâ l’aversari. Dulà che la velocitât dai zuiadôrs e pues influî tai risultâts.

---

Il Cjanton di Anute

2010-02-03T04:40:00.000-08:00

La pipine Luciane

Gno barbe predi al jere plevan a Gonârs, al viveve cun sô mari e la perpetue.

Di piçule gran part da l’an o jeri cun lôr, par di il vêr o stavi benon, mi tignivin come un dêt madûr, il barbe ogni sabide al leve in curie a Udin in biciclete (o crot a confessâsi) jo lu spietavi ansiose, mi puartave simpri alc, bombons, biscotins e ancje zugatui, al jere un predi moderni.

Al voleve viodimi simpri ben vistude, ogni tant al mandave la masarie a comprâmi un vistidut. Ma pûr o vevi alc che o desideravi di cûr, e jere une pipine che o vevi viodût in vetrine a Palme, cuant che i lei a marcjât cu la perpetue.

Une sabide il barbe al rivâ cuntune scjatule sul puarte pacs, chel fagot al jere par me, ce ligrie, e jere la pipine tant bramade, grande e biele, cun doi voi celescj, che pognete si sieravin e in pins si vierzevin (o vevi vot agns).

Une dì la mame e je vignude a cjolimi, e jere sagre a Bunzic (l’uniche fieste dal paîs). Par sta cu la none Madalene e lis gnagnis e cul papâ che al jere tornât de Argjentine, mi volevin ducj ben, o jeri contente di tornâ a cjase, il motîf, la pipine.

Le varès mostrade a Ade, la mê amie, je e veve une bieline, no tant grande come la mê che stave in pins dibessole, e pûr il diaul al metè la code par ruvinâmi la contentece. Fâmi pierdi la ligrie di vê la pipine plui biele dal paîs !!

Gno pari sot sere si sentave sul puintut de Ledre fûr cjase a cjacarâ cui amîs, e jo braurose o levi fûr e dentri cu la pipine tai braçs, un biel moment o sint un tic, un claput che al pete just tun voli de pipine, cui jerial stât a fâmi chel brut scherç?

Nuie mancul che Meni Lescin, il pari di Ade. Jo cui voi plens di lagrimis inzenoglade par tiere o cirivi i tocuts di veri, di chel biel voglut de pipinute.

Lu ai odeât tant, e lu saveve. No i ai plui cambiade une peraule cun lui, nome dopo di vecje o ai podût perdonâlu. Vuê Meni e gno pari a saran in paradis e a ridaran viodint ce co scrîf.

---

Primo Carnera

2010-01-27T03:37:00.000-08:00

Primo Carnera al è stât il plui grant pugjil Talian dal ‘900. Nassût un 25 di Otubar dal 1906, a Sequals, provincie di Pordenon, a une cuarantine di km. di Udin.Di fat al è il prin pugjil Talian a vuadagnâ il titul mondiâl dai massims.
Alt plui di doi metris, cuntun pês di 120 chilos, al è rivât a primâ cui nord americans, che di solit a son i parons di chest sport.

     La Societât Furlane di Buenos Aires, tal an 1962 e à vût l’onôr e il plasè di ricevilu te sô sede.
     La fotografie nus mostre la cene riceviment, “nol covente che ûs disi che al è chel che al sta fevelant”, sentât ae sô diestre, il Cav. Remo Sabbadini, President de Societât, e a çampe Maria Sabot Sabbadini, sô mari, fasìnti i onôrs di cjase. Si viôt altris personis socis, e ancje cualchidun de mê famee (mê mari e mê sûr).
     E fasìnti curnîs a chest cuadri di famee, si viôt il “Fogolâr”.

Al vignive metût al tapêt da une grave malatie, savût di vê pierdude la partide de vite, Primo Carnera il 22 di Mai dal’67, al vûl tornâ a Sequals, pâr murî tal so mai smenteât Friûl.
Il “Zigant bon” come che al vignive clamât, al veve da pôc finît 61 agns: al è muart il 29 di Jugn dal ’67.
---

Conte Jasidiche 2º part

2010-01-13T02:35:00.000-08:00

Si dîs che “la realtât e po superâ la finzion”.

Timp fa al è stât publicât tal blog une jentrade clamade “Conte Jasidiche”, cun tune domande finâl: ¿Voaltris ce opinion vêso?

Vuê la realtât nus a dât une rispueste.

La belance de Justizie, (ricuardais che la statue che le rapresente le mostre simpri cui voi taponats), e à mandât fûr la sô sentence; la notizie cognossude a Buenos Aires ai 18 di Dicembar dal 2009, nus dîs che la Cjamare di Cassazion e a confermât la sentence dal an 2005, che veve condanât a penis di preson che levin dai trê agns ai trê e mieç, a trê personis che vevin robât une vacje par mangjâle (il fat al jere sucedût tal Dicembar dal 2001).

I imputâts, che a vevin fameis numerosis, a àn argomentât in difese che lu vevin fât par sei tun nivel di puaretât, miserie e necessitât, (si jere te crisi Argjentine dal 2001), sostignint che robarin l’animâl par disfamâsi, za che la vacje no je stade vendude, ma a servî di aliment.

Pe Justizie Argjentine, seont i judiçs: “ni la miserie ni la necessitât di vuadagnâ la sussistence sô e de famee lu dispensâ de colpe”.

Une volte ancjemò: ¿Voaltris ce opinion vêso?
---

" Il Cjanton di Anute"

2010-01-06T03:53:00.000-08:00

Us informi che a partî dal Miercus 3 di Fevrâr e ogni prin miercus dal mes, o varin la colaborazion de Siore Anute Leonarduzzi, nassude a Bunzic, une frazion di Dignan al Tiliment. E je de classe 24, rivade in Argjentine tal 1951, e vîf a Rosari, te provincie di Santa Fé, za da une cincuantine e passe agns.

ººº

In passât “Leturis” le à vude ospit variis voltis,

Di je al è stât publicât: “Storie di un baûl”, e letare di Anute “La filande”.

Personalmentri mi àn simpri maraveâts i soi scrits, a somein naifs, spontaniis, furlans e gjenuins.

La rubriche si clamarà “Il Cjanton di Anute”, nus contarà fats personâi di vite, e ancje storiis, costruidis dal sô prolific estri. Aprofitant cheste prime jentrade dal 2010, par augurâus un an prospar e in salût.

ººº

L'ultin Dì da l'an.....

2009-12-31T03:18:00.000-08:00

La ultime gnot da l’an ancje cognossude come la “Gnot di Sant Silvestri”, za che il 31 di Dicembar al è dedicât a chest Sant, che al jere stât Pape in epoche dal Imperadôr Costantin, chest al veve decretât la libertât religjose pai cristians e i à ancje regalât al Pape il palaç “Laterano”.

Sperin che il 2010 nus puarti a ducj, “Salût, fortune e amôr”. Mantigninsi in contat a traviers di chest mieç. Mandi.

ºººº

L'An vecjo al finis,

Il gnûf, di screi,

al travierse il soiâr di miezegnot.

ºººº

Bon Nadâl

2009-12-22T10:54:00.001-08:00

Bon Nadâl,
Buon Natale,
Joyeux Noël,
Feliz Natal,
Feliz Navidad,
Merry Christmas,
Frohe Weihnachten,
----------------
Nol impuarte la lenghe che tu fevelis,

A son dutis compagnis

E za che Nadâl al è un sôl

Fâs Nadâl a tô mût

Tu rivarâs a capî e a fâti capî

Dal rest de umanitât.

-------

Di sigûr che biel lant tal timp, si e smamide la forme.

Cirin che no si pierdi la essence, che di cualsisei mût “Nadâl al è simpri Nadâl”.

Auguris a ducj.

---