martes, 3 de agosto de 2010

"Il Cjanton di Anute", La misure dal salam




     Ce fiestone par nô fruts. Apene che o sintivin rumôrs in cjase o saltavin fûr dal jet. In chê dì si purcitave, mi sarès tocjât a mi chest an tignî la code. E jere une tradizion che no mi plaseve masse,  si doveve fâlu par usâsi a dut. (cussì a disevin i vecjos).

     In cusine si sintive un davoi di pignatis, al jere dut un businôr spietant il purcitâr. Lis feminis preparant la cjalderie di aghe bulint e i oms un breâr par pogni chel puar condanât.

     Cuant che Mario al rivave si començave la vore, gno pari e Zuan Sibin lu tignivin pes gjambis. Me mari intun cjaldîr e cjapave il sanc, puar animâl si sintivin i laments par dut il paîs. Cuntune man (malvulintîr) i tignivi la code, e cun chê altre mi taponavi la orele sane, di chê altre o jeri sorde di nassite.

     Prin lu scuartavin, podopo e separavin la cjar masanantle seont il sô destin,  al jere cussì biel viodi saltâ fûr dutis chês luianiis tarondis, i salams, i musets, la palmone e cul sanc che al restave a fasevin la “mule” cu la ue passe, che a nô fruts nus plaseve tant.

     A Bunzic e jere la usance che il frut che ai tocjave tignî la code al veve di là a domandâ la misure dal salam in cjase di parincj o amiis. Mario e gno pari (birbants) si meterin dacuardi di mandâmi a domandai la misure dal salam nie mancul che al barbe predi.

     O vevi vôt agns e jo cence malizie mi presenti in canoniche, disiint a Pre Josef il motîf de mê presince. No ricuardi ce tant che al à murmugnât deventânt ros in muse come un cjapon, mi a compagnade fin fûr de puarte, jo o crodevi che al si fos smenteât, o torni sul argoment e i dîs:

     – Siôr barbe, che mi disi la misure dal salam -.
Mi cjalà a dilunc e di stuart, disintmi – Va a dîsi a chei doi pecjadôrs che ju spieti usgnot in glesie tal confessionari, lì ur darai di pinitince la misure dal salam.
---

8 comentarios:

Gabriella dijo...

Mi hai fatto ricordare un momento particolare della mia infanzia, veramente quando si uccideva il maiale era una festa! Non si andava neppure a scuola quel giorno ed il giorno seguente la maestra ci faceva narrare questa esperienza in classe.
Ormai da una trentina d'anni il maiale viene allevato negli allevamenti ed il "cjot" porcile è rimasto vuoto-


Mandi
Gabriella

Galliano dijo...

Mandi Gabriella,

Se no ti displâs ti scrîf par furlan.
Al fas plasè cjatâ personis come te, dulà che chestis storiis ai fasin sovignî ricuarts di timps passâts. Tal "Cjanton di Anute" e scrîf une siore di 86 agns, Anute Leonarduzzi, di Rosari Argjentine, che colabore une volte al mês cul mio blog.
Ti disarai che "L'albero dei sassi" mi à colpît unevore, interessant e dens.
Di cheste part dal mont, ti mandi tancj saluts.

Gabriella dijo...

Brvissime Anute a contà chestis storiis o stares dut il dì a leilis, mi plasin lis contis di une volte e an el savor dal Friùl.
Mandi di Seorgnan de Tor.

Gabriella

Unknown dijo...

O vevi dismenteât cheste scuâsit cerimonie dal purcitâ che contât cussí a di chei che no an mai dovût partecipâ, o al somee barbar o al somee altamenti civilizât par vie che, a si lu sà ducj, le robe fate in cjase a no é come chê dal supermarcjât:-)
O ai cjatât ne foto par celebrâ chest moment. Le metarai tal blog e o disarai di vignî a lei le storie achi.Mandi.

Galliano dijo...

Gabriella,
Jo o soi nassût a Tresesin, di frut in determinadis circostancis si jemplave un cjar di int (dute famee) e o levin li de ostarie di "Gjambate", se no fali e je lì des tôs bandis, o a Seorgnan o a Çumpite. Ce impuartants che à son i ricuarts, ti traspuartin come ta un tunel dal timp.
Cumò mi doi cont le che à tu cjatis i to "Sassi", te Tor.
mandi.

Galliano dijo...

Jaio,

Che tu vedis scuasi smenteât cheste cerimonie si po logâti tune fasse plui zovine di altris.
Ai zovins ur podarà parè une cerimonie barbare, dut cas, vuê in dì i rituâi modernis e puedin no someà tant trements, ma a àn la stesse finalitât.
Graciis de colaborazion cu la tô fotografie.
Mandi.

Anónimo dijo...

Ancjemò no vevi let cheste storie di Anute. O jeri passade tal blog di Jaio e ancje jo i vevi contât da la misure dal salamp da lis mês bandis ...
un 15 agns fa une siore di Prissinins, paîs tacât di Palaçûl, mi à contât di une usance che jo no cognossevi par nie. Di un scherz ca i fasevin ai fruts che viodevin purcità par la prime volte. Ai davin un sac e a lu mandavin ator pe cjasis a domandà la "misure dal salamp". La înt e consegnave lêns o altris robis ca vevin di jessi la misure dal salamp. Cussì il frut al veve un bon ce fà a strissinasi daûr il sac ma al varès imparât a no fâ plui la figure dal salamp.

Mandi e ogni ben.
Gjovane

Galliano dijo...

Mandi Bete
O vevi let il to coment sul blog di Jaio.
Tal mio paîs no vevin cheste usance di mandâti a domandâ la misure, dut câs e jere ancje une maniere di fasi une ridade, su lis spalis di chel puar frut.