Gno barbe predi al jere plevan a Gonârs, al viveve cun sô mari e la perpetue.
Di piçule gran part da l’an o jeri cun lôr, par di il vêr o stavi benon, mi tignivin come un dêt madûr, il barbe ogni sabide al leve in curie a Udin in biciclete (o crot a confessâsi) jo lu spietavi ansiose, mi puartave simpri alc, bombons, biscotins e ancje zugatui, al jere un predi moderni.
Al voleve viodimi simpri ben vistude, ogni tant al mandave la masarie a comprâmi un vistidut. Ma pûr o vevi alc che o desideravi di cûr, e jere une pipine che o vevi viodût in vetrine a Palme, cuant che i lei a marcjât cu la perpetue.
Une sabide il barbe al rivâ cuntune scjatule sul puarte pacs, chel fagot al jere par me, ce ligrie, e jere la pipine tant bramade, grande e biele, cun doi voi celescj, che pognete si sieravin e in pins si vierzevin (o vevi vot agns).
Une dì la mame e je vignude a cjolimi, e jere sagre a Bunzic (l’uniche fieste dal paîs). Par sta cu la none Madalene e lis gnagnis e cul papâ che al jere tornât de Argjentine, mi volevin ducj ben, o jeri contente di tornâ a cjase, il motîf, la pipine.
Le varès mostrade a Ade, la mê amie, je e veve une bieline, no tant grande come la mê che stave in pins dibessole, e pûr il diaul al metè la code par ruvinâmi la contentece. Fâmi pierdi la ligrie di vê la pipine plui biele dal paîs !!
Gno pari sot sere si sentave sul puintut de Ledre fûr cjase a cjacarâ cui amîs, e jo braurose o levi fûr e dentri cu la pipine tai braçs, un biel moment o sint un tic, un claput che al pete just tun voli de pipine, cui jerial stât a fâmi chel brut scherç?
Nuie mancul che Meni Lescin, il pari di Ade. Jo cui voi plens di lagrimis inzenoglade par tiere o cirivi i tocuts di veri, di chel biel voglut de pipinute.
Lu ai odeât tant, e lu saveve. No i ai plui cambiade une peraule cun lui, nome dopo di vecje o ai podût perdonâlu. Vuê Meni e gno pari a saran in paradis e a ridaran viodint ce co scrîf.
---




