Il presut di San Denêl

     In Friûl, il purcit al è un animâl tipic che si esprim al miôr tal presut crût di San Denêl ,famôs dapardut, la produzion dai presuts di cheste gaiose citadine dal Friûl di mieç in provincie di Udin, a derive des particolârs cundizions climatichis di cheste localitât culinâr situade tra lis Alps Cjargnelis e il mâr adriatic, e al è propit l’aiar di San Denêl, une crosere de brise che ven sù de lagune e lis foladis fredis e sutis che vegnin jù da lis Alps, che involucin par tancj mês la cjâr metude a stagjonâ.

     Si conte che i Cels, antîcs abitants dal Friûl,  a forin i prins te storie a conservâ lis cuessis dai purcits usant jerbis particolârs, asêt e fum, la cjar purcine e jere il lôr mangjà preferît.

     Lis cronichis de epoche a contin che il Patriarcje di Aquilee, si fos preocupât di “saurî” la permanence dai prelâts riunîts tal Concili di Trent , mandantjur une cuantitât di persuts. Cheste specialitât furlane si le cjatave ancje tes taulis de Serenissime e des corts Austriachis e Francesis.

     Viers i finâi dal Votcent a San Denêl e jere za cualchi dite che e  produseve chest deliziôs prodot, e che a podevin ingloriâsi dal riferiment di sei “furnidôrs de Cjase Reâl ” e dai “ Sacris Palaçs Apostolics”.

     I prins stabiliments destinats a une produzion autonome (ju cjatin bielzà tal 1920) a scomencin a metile in confezions, involuçant lis fetis ben finis in cjarte veline, in scjatuletis fatis cun tun len lizêr.
Tor il 1930 chest sisteme al fo sostituît cul sisteme “sot vueit”, e lis scjatuletis a erin di late e a vevin la lungjece di une fete di presut.

    Tai agns sucessîf chestis “ditis” si trasformarin di produtôrs artesanâi in veris industriis, tal cors dai agns 80 o vin viodût une consistente jentrade di impresis di plui grandis dimensions, cence pierdi la forme artesanâl di stagjonâ il persut.
-
     A Buenos Aires cheste delicatece e ven impuartade. E cuntune pocje di fortune cualchi pariint o amì te puarte di regâl une scjatolete tornant dal Friûl.
---